WALA INUGBAYAD SA ILIMNAN, NAGDIRETSO SA PRISOHAN

Share on facebook
Share on google
Share on pinterest
Share on twitter
Share on print

PRISO sa custodial facility sang police station 1 ang duha ka lalaki, matapos gin-alegar nga wala nakabayad sa ilimnan sa BHE BHE Videokihan kag Bar sa dalan San Juan, Barangay 12, syudad sang Bacolod kaina mga las 2:30 sang kaagahon.

Ang mga na-priso ginkilala kay Joner Abalo, 27 anyos, sultero nagapuyo sa syudad sang La Carlota kag Willie Salomon, 28 anyos may asawa nagapuyo naman sa Bayawan, probinsya sang Negros Oriental.

Suno sa tagreklamo nga si Merlyn Abelarde, 36 anyos sang Barangay 6, sining syudad, una nga naglakat ang iban nga upod nanday Salomon kag Abalo kag nagpasalig nga magkuha sang dugang nga kwarta agud ibayad sang ila gin-inom nga naglab-ot sa kapin 1,800 pesos. 

Magasira nalang ang ilimnan, apang wala nagbalik ang mga ini, rasun ining duha nga bilin amo ang gintawgan sang pulis.

Depensa naman nanday Joner kag Willie, indi nila kilala ang amo nga mga tawo, na-abyan lang nila sa amo nga ilimnan. 

Dugang pa sang mga suspetsado, ulihi na sila nga nag-abot sa ilimnan kag separar man ang ila lamesa.

Nagala-um ang duha nga mabayran sadtong mga tawo nga nagpalagyo kag makaguwa sila sa prisohan kay may ubra na sila buwas nga adlaw lunes sa isa ka balaligyaan diri sa Bacolod. 

PFIZER NGA BAKUNA SANG NEGROS OCCIDENTAL PAGAUSARON UMPISA HUNYO 28

1,000 ka mga persona kada adlaw ang target nga mabakunahan sang Pfizer-BioNTech COVID-19 Vaccine sa Negros Occidental.

Suno kay Provincial Administrator Atty. Rayfrando Diaz II, maga umpisa  ang pagbakuna   sa Hunyo 28  tubtub Hulyo 2, 2021  sa duha ka mga gindesignar  nga vaccination sites.

Ini amo ang Teresita L. Jalandoni Provincial Hospital sa syudad sang Silay    kag Negros Residences sa syudad sang Bacolod.

May 300 ka mga tawo ang target nga mabakunahan sa Silay kada adlaw, samtang 700 naman sa Bacolod.

Gin-athag ni Diaz nga may 2 lamang ka vaccination areas nga gintalana ang probinsiya, bangud diri nahamtang ang Ultra Low Freezer  para sa Pfizer vaccines.  | Aksyon Marlon Genovea

PASAPORTE GIN PROMOTE BILANG BRIGADIER GENERAL

Lubos nga ginpasalamatan ni 303rd Infantry Brigade Commander Inocencio Pasaporte si Presidente Rodrigo Duterte kag AFP Board of Generals matapos ginpromote ini sa ranggo nga Brigadier General.

Suno kay Brig. Gen. Pasaporte, gin-aprobahan ni Presidente Duterte ang iya promotion upod sa 4 ka mga senior officers tinalikdan nga Martes, Hunyo 22.

Dugang pa ni Pasaporte ginakabig nga kadalag-an sang tanan nga mga miembro sang Philippine Army sa Negros Occ. ang promotion bilang bag-o nga Heneral sang AFP bangod daku ang nangin kontribusyon sang mga soldado para sa ila mga nalab-ot.

Ginpahayag man ni Pasaporte nga sa pihak sang pandemya, padayon ini nga magapangalagad sa bug-os nga probinsya ilabi sa pagpakig-away sa Covid-19 paagi sa pagpadala sang mga militar nga nagaserbi bilang contact tracers, pagbantay sa 5 ka mga Quarantine Boarder Control nga nagatapik sa Occidental kag Oriental kag madamo pa nga iban. | Aksyon Alvin Grava

MORE STORIES:

LIKE US ON FB

error: Ooops... You are not authorized to copy this content.