Maga implementar sang estrikto nga border control, restriction sa hulag sang mga tawo kag internal security ang syudad sang Victorias, agud malikawan ang pagdamo sang kaso sang Covid-19 sa ila syudad umpisa bwas nga adlaw Agusto 26 tubtub Agusto 31, 2020.
Sa Executive Order (EO) No. 40 Series of 2020 nga ginpirmahan ni Mayor Francis Frederick P. Palanca napetsahan Agusto 25, 2020, iya ginpahayag nga bangud sa maka-alarma nga kaso sang COVID-19 sa syudad sang Bacolod kag iban nga bahin sang Negros Occidental, kinahanglan nga ipatuman ang amo nga mando agud mapunggan ang lapnagon nga kontaminasyon kag local transmission sa ila syudad.
Tugutan lamang nga makasulod sa Victorias ang mga essential workers kag empleyado sang establisyimento ukon industriya sa syudad kag Authorized Persons Outside Residence ukon APOR.
Kinahanglan nga magpresentar sang valid negative RT-PCR certification ang mga returning Victoriahanons kag makig-angot sa Victorias City IATF.
Maga-isyu sang ID ang barangay nga gamiton sa pag-access sa essential goods kag medical supplies sa tion sang Modified General Community Quarantine.
May i-set-up man nga barangay Checkpoints sa mga barangay borders nga amo ang maga inspection sa Barangay I.D. kag work documents sang APOR. | Aksyon Marlon Genovea