Natumba ang tatlo ka mga puno sang kahoy bangod sa mabaskog nga hangin kag nag humok nga duta sa syudad sang Bacolod, kahapon nga adlaw, Domingo.
Suno kay Executive Assistant Joemarie Vargas, cluster head sang Bacolod CDRRMO, natumba ang isa ka puno sang star apple malapit sa Bata Elementary School sa Barangay Bata kag natumbahan ang tatlo ka mga tricycle pero wala man sang dako nga halit.
Nakabaton man sang report ang CDRRMO nga may natumba nga puno sang paho kag ang pinakadako nga puno sang sambag sa 5th road sa Barangay Taculing.
May natumba man nga poste sang PLDT sa area sang dalan Lacson-San Sebastian. Wala sang may nasamaran sa sini nga mga hitabo.
Samtang, gin pahayag ni Vargas, nga bukas ang ila talatapan para mag bulig sa Ceneco sa tion nga may mga puno nga naga angut sa linya sang kuryente nga dapat ipaidalum sa pruning operation.
Suno kay Vargas, kahapon man nga adlaw, may sanga sang kahoy nga nag igo sa linya sang kuryente sang Ceneco sa Barangay Alijis, nga nag resulta sa brownout sa pila ka area sa syudad lakip na sa Barangay Singcang-Airport.
Subong nga Lunes sang aga, wala sang may na-monitor ang Bacolod CDRRMO nga pag saka sang tubig sa syudad.
