Dismayado ang 72 anyos nga manugtalaba matapos nadiskrubrihan nga halos naubos ang ginasagod sini nga talaba sa baybayon nga sakop sang Reclamation Area, Barangay 12 syudad sang Bacolod.
Ginapaligban karun ni Rufino Ablando, sang Purok Magti-ayon, Barangay 12 sa Bacolod, kun paano liwat makapatubo sang talaba agud makuhaan sang palangitan-an.
Sa interview sang Aksyon Radyo Bacolod kay Ablando, gin-aligar sini nga naubos kawat sang wala makilal-an nga mga persona ang talaba nga natalana nga kun tani anihon sini nga bulan sang Hulyo.
Nagpauli si Ablando bitbit ang isa ka putos sang talaba nga ginabulubanta nagabug-at gid lamang sang duha ka kilo kag nagabili sang 50 pesos kun ibaligya sa merkado.
Ang talaba kun gin-ani subong nga bulan sang Hunyo ang iya ginabulubanta nagabalor kun tane 51,000 ka pesos.
Suno kay Ablando, amo gid lamang ini ang iya nga palangitan-an agud mapakaon ang iya pamilya kalakip na ang apat ka mga apo nga sa iya nagapuyo.
Aminado ang senior citizen nga wala niya hugot nga nabantayan ang talabahan sumugod sang ginpatuman ang community quarantine sadtong bulan sang Marso.
Ginlaragway ni Ablando nga sadto halos adlaw-adlaw ini nga nagasalom sa baybayon sang Reclamation Area agud makit-an ang sitwasyon sang iya mga ginasagod nga talaba apang sang pag-amat-amat balik sa normal tumalagsahon nalang sini mabantayan.
Ang talabahan ni Ablando ang may kalaparon nga 240 metro sentegrado kag nagsugod sadtong tuig 2017 matapos makabaton sang bulig pinansyal gikan sa lokal nga gobyerno sang syudad sang Bacolod.
Bilang isa ka benepisyaryo sang Social Amelioration Program (SAP), nagalaum karun si Ablando nga ipanagtag na kun tani ang sais mil pesos nga ayuda para sa second tranche para may ibakal sang mga kinahanglanon sa ila puluy-an kag sa liwat nga pagsagod sang talabahan.
LABOR GROUP
Nagapanawagan naman ang General Alliance of Workers Association (GAWA)-Negros Occidental sa gobyerno nga hatagan sang igtalupangod kag bulig ang mga magagmay nga negosyante agud liwat nga maka-umpisa sang ila palangitan-an.
Suno kay GAWA-Negros Secretary General Wennie Sancho, ang agrikultura ang isa sa may pinakadako nga kontribusyon sa pagsanyog sang ekonomiya rasun kun nga-a nagakadapat lamang nga buligan ini sang gobyerno paagi sa paghatag sang kapital sa mga magagmay nga negosyante kag ayuda para sa mga trabahante ukon supplier nga nawad-an sang trabaho.
Basi sa rekord sang GAWA-Negros as of 2017, ang Western Visayas ang may 31, 792 ka mga mamugon sa hanay sang agrikultura ukon 8.5 porsyento sang kabilugan nga numero sang mga mamugon.
Sa kabug-usan nga pungsod Pilipinas, masobra naman isa ka milyon ang mga mamugon sa sektor sang agrikultura.
Sa piyak sini, nagapati si Sancho nga ang agrikultura sa gihapon ang pinakakinahanglanon sa tion sang krisis rasun kun ngaa nagakadapat lamang ini suportahan sang gobyerno.
Gindayaw ni Sancho si Ablando bangud nga sa piyak sang krisis nga ginapangatubang nagatinguha ini nga makabangon paagi sa liwat nga pagsagod sang talaba. | Aksyon John Diaz