Pagahugtan sang lokal nga panguluhan sang syudad sang Talisay Negros Occidental ang pagmonitor sa mga returning Locally Stranded Individuals (LSIs) sa ila syudad, agud masiguro nga makapakig-angot ini una sa ila , antis tugutan nga makapauli sa puluy-an.
Ini ang ginpahayag ni City Administrator Atty. Jonathan Ealdama sa interview sang Aksyon Radyo Bacolod.
Suno kay Ealdama, may pila ka mga LSIs halin sa Iloilo nga taga Talisay , ang nagamit sang address nga Bacolod agud direkta nga makadiretso pauli sa ila puluy-an.
Dugang pa ni Ealdama, makig-angot siya kay Bacolod City Legal Officer Atty. Joselito Bayatan kag Inter-Agency Task Force sang syudad, agud hambalan ang amo nga problema.
Sa regular meeting sang Talisay-IATF kahapon Nobyembre 10, ginpanawagan ni Mayor Neil Lizares sa mga pumuluyo nga mangin vigilante kag ireport sa mga opisyal sang barangay ang presensiya sang LSIs, para mapaidalom sa swab testing kag facility quarantine protocols. | Aksyon Marlon Genovea