Ginklaro sang tagdumalahan sang isa ka bag-o lang nagbukas nga resort sa Purok Aning, Brgy. Pahanocoy syudad sang Bacolod nga nagsunod sa health protocol ang tanan nga bisita nga nagtambong sa grand opening sang resort.
Aminado ang isa sa mga stakeholder sang resort nga si Jenny Mae Ganaba nga may nagluntad nga pagtililipon sadtong Enero 15 sang gab-e apang mga himata kag abyan gid lamang sang tag-iya sang resort ang nagtambong.
Suno kay Ganaba, ang tanan nga tumalambong ang nakasuksok sang face mask kag nagsunod sa social distancing.
Gin-ako man ni Ganaba nga may nagluntad gid man nga foam party apang kontrolado man ang tawo kag sa gihapon napatuman ang minimum health protocol.
Pagpahayag ni Ganaba nga mahimo may yara sang mga persona sa likod sang pagpalapta sang video sa social media bangud sang kahisa sa ila negosyo.
Bukas naman ang tagdumalahan sang resort sa imbestigasyon nga patigayunon sang Bacolod Emergency Operations Center.
Sa text message sa Aksyon Radyo Bacolod sang Bacolod EOC Deputy for Medical Services nga si Chris Sorongon, ginpahayag sini nga nagapadayon pa ang imbestigasyon sang mga otoridad sa kaso sang resort. | Aksyon John Diaz