Nagpahanumdom si DepEd Negros Occidental PIO Ian Arnold Arnaiz sa mga manunudlo kag ginikanan nga ikonsiderar ang mental kag emotional health sang kabataan sa panahon subong nga kinahanglan mag-adjust sa pagtuon tungod sa COVID-19 pandemic.
Sa interview sa Aksyon Firing Line kaupod ni Aksyon Bryan Morden, ginpanugyan ni Arnaiz sa mga manunudlo nga maghagan-hagan lamang sa paghatag sa mga aktibidad sa mga estudyante kag sa mga ginikanan, indi magpasobra ang pressure sa pagpatuon sa mga kabataan.
Suno kay Arnaiz, mahimo nga halinan ini sang pagkadula sang kabataan sa interes sa pagtuon bangod sa pressure nga ila ginabatyag.
Ginhimo ni Arnaiz ang pahanumdom kasunod sang naglapta nga video sa social media sang isa ka estudyante nga nagahibi samtang nagahingyu sa iya mga manunudlo nga indi pagpasobrahan ang ginapahimo nga ulubrahon sa kada subject tungod dako na ang epekto sini sa iya pagbalanse sa oras sa pagtuon kag sa ulubrahon sa balay. | Aksyon Ann Defensor