Gina duso sang Sangguniang Panlungsod sa Bacolod sa National IATF ang liwat nga pag palawig sang enhanced community quarantine ukon ECQ sa syudad sang Bacolod tubtob Mayo 15.
Ini matapos nga unanimous nga gin aprubahan sang SP ang resolusyon nga gin-author ni Councilor Renecito Novero sa special session nga gin patigayon kaina sang aga, Abril 28.
12 ka mga Konsehal ang present sa session samtang naka sick leave si Councilor Elmer Sy kag si Councilor Carl Lopez ang na abtan sang lockdown sa Manila.
Suno kay Vice Mayor El Cid Familiaran, ini ang rekomendasyon sang konseho kasunod nga magatakop ang ECQ sa Abril 30 kag nakadepende sa National IATF kon ila ini paboran.
Suno sa Bise-Alkalde, sa tion nga indi magsugot ang National IATF, handa ang Bacolod nga mag sunod sa General Community Quarantine (GCQ) umpisa Mayo 1.
Gin ehemplo ni Familiaran nga ang Iloilo ang may pito ka Covid-19 cases pero gin tugutan nga mag palawig sang ECQ para ma-contain ang paglapta sang virus.
Isa sa mga gin basehan sang SP sa pagpasar sa resolusyon amo ang mga PENDING nga resulta sang Covid-19 test sa Bacolod kag ang local community transmission sa duha ka mga barangay.
Una nga gin-classify sang National IATF nga moderate-risk area ang Negros Occidental kag ipaidalum sa GCQ.
Ang aprubado nga resolusyon ang ipadala sa Office of the President sa Malacañang, National kag Regional IATF Office, Office of the City Mayor, Congressman Greg Gasataya, Governor Eugenio Jose Lacson kag iban pa.
Samtang ginpahayag ni Bacolod Mayor Evelio Leonardia nga premature pa para i-lift ang ECQ sa Abril 30 bangud nagasugod palang naga gwa ang local transmission, base man sa notisya gikan sa health authorities.
Ini ang kabahin sang mensahe ni Leonardia matapos gin aprubahan sang SP ang nasambit nga resolusyon.
Gin pasalamatan ni Leonardia ang SP kag si Familiaran sa madasig nga tikang nga ila gin himo matapos nga iya ini gin pangabay.
Suno sa Alkalde, ang pagpalawig sang ECQ ang tuyo nga ma proteksyunan ang mga pumuluyo sa Covid infections, nga madasig nagalapta kon nagahulag ang madamo nga tawo sa idakum sang relaxed quarantine conditions.
Suno kay Leonardia nga kon may unity ang syudad mangin madinalag-on ang Bacolod sa sini nga gyera. | Aksyon Dale Salazar
