SP GIN APRUBAHAN ANG 19M PARA SA PERFORMANCE-BASED BONUS SANG MGA EMPLEYADO

Share on facebook
Share on google
Share on pinterest
Share on twitter
Share on print

Kwalipikado ang syudad sang Bacolod nga mag hatag sa 2019 Performance-Based Bonus ukon PBB para sa mga empleyado.

Suno kay DILG Bacolod Director Maredith Joy Madayag, ila gin pabalo si Mayor Evelio Leonardia sang sini nga otoridad nga mag hatag sang PBB, nga gin base sa performance sang LGU sang 2019.

Dugang pa ni Madayag, ang Seal of Good Local Governance ukon SGLG award nga nakuha sang Bacolod sang 2019 ang isa man sa gin basehan sa pag grant sang PBB.

Gin klaro ni Madayag nga ang bonus ang naga depende sa savings sang syudad kag performance sang kada talatapan.

Sa press release sang syudad, nag pangabay si Leonardia sa Sangguniang Panlungsod nga mag pasar sang appropriation ordinance angut diri.

Nobiembre 2019, sang ang Bacolod ang nangin national awardee sang 2019 SGLG award gikan sa DILG.

Kaina sang hapon sang gin aprubahan sang Sangguniang Panlungsod sa first, second, third kag final reading ang appropriation ordinance para sa PBB.

Kapin 19 million pesos ang gin pain nga pondo para sa amo nga bonus.

Sa virtual session, gin pahayag ni Vice Mayor El Cid Familiaran, apat ka mga talatapan nga gina kabig best performer ang makabaton sang 65% sang ila Disyembre 2019 nga sweldo samtang ang iban ang makabaton sang 57.7% sang ila sweldo sa parehas nga panahon.

DUHA PILASON SA INSIDENTE SANG PAGPANGLABU SA CALATRAVA

Ginabulong karon sa San Carlos City Hospital ang 56 anyos nga amay matapos ginlabu sang mag-utod las 10:15 kagab-i sa Sitio Atabay, Barangay San Isidro, banwa sang Calatrava.

Ang biktima ginkilala kay Francisco Boliboli samtang ang mga suspek amo sanday Felipe Retable ,60 anyos, kag manghod sini nga si Bobby, 47 anyos, lunsay  residente sang amo nga lugar.

Sa inisyal nga pagpangusisa ni PMaj. Roberto Indiape, bangod gid lamang sa sa personal nga away kag kutsukutso, ginsulong sang mag-utod ang biktima ginbuno  kag ginlabu. 

Si Boliboli ang nakaangkon sang pilas sa likod sang lawas kag butkon.

Sa amo nga insidente, nakita ni Atellano Jorolan (umagad sang biktima) nga ginalabu sang mag utod ang  iya ugangan,  nagkuha man ini sang binangon kag ginlabu si Ratable.

Una nga gindala si Boliboli sa Calatrava District Hospital kag gilayon ginforward sa San Carlos City Hospital samtang si Ratable ang ginabulong sa Corazon Locsin Montelibano Memorial Regional Hospital.

Sa follow-up opreration sang kapulisan, nadakpan si Bobby samtang si Felipe ang buluntaryo nga nagsurender sa mga otoridad. | Aksyon Alvin Grava

VACCINATION KONTRA COVID-19 SA AYALA MALL NAG UMPISA NA

(Bacolod PIO Photo, May 8, 2021)

Ginkalipay ni City Administrator kag EOC Executive Director Em Ang nga nangin matawhay ang vaccination activity karon nga adlaw sa Ayala Mall.

Suno kay Ang, husto ang desisyon nga ginhimo sang EOC nga indi dapat pagtugutan nga maka pabakuna ukon akomodahon ang pila ka mga indibidwal nga wala maka pa rehistro ukon gina kabig nga mga walk in applicants.

Dugang pa ni Ang, ini na ang estratehiya nga ila paga gamiton umpisa sa masunod nga semana angut sa naga padayon nga vaccination program sang syudad.

Base sa plano sang EOC, yara lamang sa 200 ka mga indibidwal ang ila plano nga akomodahon kada adlaw para malikawan ang pag ginutok sang publiko ilabi na sa mga mall nga ila gin utilize bilang vaccination center. | Aksyon Art Tayhopon

MORE STORIES:

LIKE US ON FB

error: Ooops... You are not authorized to copy this content.