Bangud sang dedikasyon nga makatuon apisar sang kabudlayan nga dulot sang pandemiya, nagtinguha ang isa ka Grade 12 Humanities and Social Sciences (HUMSS) student sang nga makatambong sa online class.
Sa interview sang Aksyon Radyo Bacolod kay Jennylyn Mae Casipit, ginpanginbulahan sini ang bulig kag sakripisyo nga ginhimo sang iya nga lolo sa pagtukod sang payag sa ibabaw sang kahoy para lamang makakuha sang maayo nga signal sa iya nga telepono nga ginagamit sa pag-intra sa online class.
Ang iya lolo ginkilala kay Florentino Bernadas, 72 anyos.
Ginlaragway ni Casipit nga mabakod ang ginhimo nga payag sang iya nga lolo.
Suno kay Casipit, siya ang naga-eskwela sa syudad sang Bacolod apang sang nagdeklarar sadto nga ipaidalom sa lockdown ang syudad nagdesisyon ang ila pamilya nga gilayon magpauli sa probinsya sang Guimaras.
Aminado si Casipit nga may kabudlayan sa internet connection ang ila nga lugar apang bangud sang iya personal nga tinutuyo nga magpadayon sa pagtuon nagpangita ini sang pamaagi.
Suno kay Casipit mahimo man ini makapaidalom sa modular class nga ginatanyag sang ila bolothoan apang mas ginpili sini nga magtambong sa virtual class agud mas ma inchindihan ang pagtulun-an.
Ginkalipay sini ang suporta sang iya pamilya ilabi na sang iya nga lolo.
Si Casipit ang agot sa duha ka mag-ulutod.
Ginklaro ni Casipit nga wala siya ginpilit sang bolothoan kun sa diin siya naka enrol apang personal lamang nga desisyon.
Handum ni Casipit nga mangin isa ka pulis agud mabuligan ang iya pamilya kag ang komunidad.
Ginpaathag ni Casipit nga luyag man niya ipabutyag sa kaangay nga estudyante nga hatagan sang importansya ang edukasyon. | Aksyon John Diaz