Ginklaro ni Senate Committee on Agriculture and Food Chair Cynthia Villar nga wala ginsuspender ang importasyon sang bugas sa Pilipinas, kundi ginlimitahan lamang bangud sa pag-umpisa sang harvest season.
Sa pagbisita ni Villar sa syudad sang Bacolod kadungan sa una nga adlaw sang Negros Farmers Organic Festival, ginpahayag sini nga ginsugdan na sang gobyerno ang pag-implementar sang mas estrikto nga pagsulundan sa pag-isyu sang sanitary kag phytosanitary import clearance sa mga rice traders.
Ini ang nagapanguna nga kinahanglanon antis pahanugutan ang mga traders nga makaimport sang bugas. Nagapati si Villar nga madamo sang mga rice importers ang mapilitan nga magbakal sang bugas sa lokal nga mangunguma.
Sandig sa datus sang Bureau of Customs, 1.9 metriko tonelada sang bugas ang nagsulod sa Pilipinas antis pa naman maaprobahan ang Rice Tarrification Law sang Marso.
Samtang, ginpaandaman ni Villar ang mga ahensiya sang gobyerno nga manabat sa senado, kun mapaslawan sa pag-implementar sang mga programa nga nagabulig sa mga mangunguma sang humay.
Ginsiling ni Villar nga may 947 ka mga munisipalidad sa pungsod ang makabaton sang P5 milyones pesos nga balor sang farm equipment kag machinery kada tuig, bilang bulig sa mga mangunguma sa idalom sang Rice Competitiveness Enhancement Fund.
Dugang pa ni Villar, dapat ipatuman ini sang Philippine Center for Postharvest Development and Mechanization kag Phillippine Rice Research Institute.
Pila pa sa mga bulig nga ginpresentar sang senador nga dapat ihatag sa mga benepisyaryo nga mangunguma paagi sa Departments of Agriculture kag Environment and Natural Resources , amo ang binhi sang humay, composting kag plastic recycling facility. | Aksyon Marlon Genovea