SEKTOR SANG NEGOSYANTE GINA DUSO NGA IPATUMAN ANG CURFEW SA BACOLOD UMPISA 12 MIDNIGHT TUBTOB 4 AM

Share on facebook
Share on google
Share on pinterest
Share on twitter
Share on print

Gina duso sang hanay sang mga negosyante nga i-adjust ang oras sa pagpatuman sang curfew sa syudad sang Bacolod humalin las 10 sang gab-i tubtob las 4 sang kaagahon pakadto las 12 sang tungang gab-i pakadto las 4 sang kaagahon.

Sa interview sang Aksyon Radyo, gin pahayag ni Frank Carbon, chief executive officer sang Metro Bacolod Chamber of Commerce and Industry, ila sa karon gina konseho ang iban nga negosyante kag ang response sang publiko sa social media angut sa ila proposal antes mag padala sang pormal nga komunikasyon sa syudad sa masunod nga semana.

Gin paathag ni Carbon, ila gina duso ang dugang nga duha ka oras sa pag operar sang negosyo sa gab-i bangud kinahanglan sang syudad sang kwarta kag ini ang maga resulta sa mas madamo nga revenue.

Suno kay Carbon, kon mag lawig ang business hours, ini ang maga resulta sa dugang nga bayad sa mga empleyado.

Paga tun-an sang Bacolod IATF ang ini nga proposal .

Suno kay Vice Mayor El Cid Familiaran, chairman sang Bacolod IATF, si Mayor Evelio Leonardia ang may batasan nga una nga magkonsulta sa otoridad kag pamatian ang ila rekomendasyon antes nga mag himo sang desisyon.

Para kay Familiaran, mataas ang porsyento nga malatnan sang Covid-19 sa mga closed spaces kaangay sang bar ilabi na kon aircon ang pasilidad.

Suno sa Bise-Alkalde, dapat ma balanse man ang ekonomiya kag ang isyu sa ikaayong lawas.

Sa nahibaluan, damlag lang gin aprubahan kag pirmado na ni Leonardia ang curfew ordinance sang Bacolod umpisa las 10 sang gab-i tubtob las 4 sang kaagahon bilang isa sa mga precautionary measures kontra Covid-19. | Aksyon Dale Salazar

MORE STORIES:

LIKE US ON FB

error: Ooops... You are not authorized to copy this content.