Nanawagan si Roy Yanson sa iya iloy kag kauturan nga magpungko sila bilang isa ka pamilya kag hambalan kon paano masolbar ang problema nga gina-atubang sa karon sang pamilya Yanson.
Nagpahayag man sang kasubo si RSY, nga bangod sang mga isyu nga wala ma-estoryahan, naglambot na sa indi pag intiendihanay kag inaway sang pamilya.
Sa isa ka press conference, gin athag ni RSY nga wala sila sang tuyo nga ipalayag sa publiko ang mga isyu sang pamilya kag ibutang ang ila kaugalingon sa trial by publicity.
Suno pa kay RSY nga kon magpadayon pa ang ilinaway sang pamilya, wala man sang may magdaog sa ila. Dugang pa nga panawagan ni RSY nga ang tanan magpatawad sa isa kag isa.
Ang panawagan ni RSY bilang kamagulangan, ang iya ginapatungod sa iya iloy nga si Olivia kag sa iya mga utod nga sanday Emily,Ginnette,Celina,Ricky kag Leo Rey.