Negros Occidental- Prayoridad ni Negros Occidental Vice Governor Eugenio Jose Lacson ang road concreting project sa mga lugar nga masami ginabisitahan sang mga turista, sa iya pagpungko bilang bag-o nga gobernador sa tuig 2019.
Suno kay Lacson, kabahin ini sa iya mga plano agud mapasanyog pa ang industriya sang turismo sa probinsiya.
Nagasalig ang bise gobernador nga kun ini ang matigayon sa iya administrasyon, magadamo pa ang mga tourist arrivals kag posible nga malampuwasan ang iban nga mga probinsiya.
Sandig sa record sang Department of Tourism ukon DOT, ika-duha ang Negros Occidental sa mga probinsiya sa Western Visayas nga may pinakadamo nga tourist arrivals sadtong tugi 2017.
Sadtong bulan sang Septyembre, gin-umpisahan naman sang Department of Public Works and Highways ang PHP100 million pesos nga road concreting project sa Barangay Bi-ao banwa sang Binalbagan, nga kabahin sa DOT Tourism Board Infrastructure Program.