Gin aprubahan sang Sangguniang Panlungsod sa Bacolod ang resolusyon nga naga pangabay sa DSWD, Office of Senior Citizens Affairs, Office of the Persons With Disability paagi sa talatapan ni Mayor Bing Leonardia kag sa tanan nga drug store sa syudad nga tugutan ang mga senior citizen kag PWDs nga mag bakal sang masobra isa ka bulan nila nga bulong.
Ini ang base sa resolution nga gin author ni City Councilor Simple Distrito nga gin paboran sang konseho.
Nasaad sa resolusyon nga karon tubtob lamang sa isa ka bulan nga bulong ang pwede nga mabakal sang mga senior citizen kag PWD, base man sa guidelines sang IATF.
Suno sa konsehal, dapat tugutan ang mga tigulang kag PWD nga mag bakal sang bulong sang masobra isa ka bulan kon may yara sila sang prescriptions para malikawan ang ila nga pagwa.
Dugang pa ni Distrito, may mataas nga risgo kag prone ang mga tigulang kag PWD sa mga infection partikular na ang Covid-19.