RALLY KONTRA ANTI-TERROR ACT GIN PATIGAYON SA BACOLOD; 3RD ID GINA ABI-ABI ANG LAYI

Share on facebook
Share on google
Share on pinterest
Share on twitter
Share on print

Dismayadu ang mga progresibo nga grupo sa idalum sang Bagong Alyansang Makabayan ukon Bayan-Negros matapos ginpirmahan ni Presidente Rodrigo Duterte ang Anti-terror bill kag karon isa na ka layi.

Suno kay Bayan Negros deputy Sec. Gen. Ereneo Longinos, kasubo kag ka-akig ang nabatyagan sang mga mangunguma ilabi na sang ila hanay matapos nga nangin layi na ang kontrobersyal nga hagna.

Dugang pa ni Longinos, sensyales na ini sang madulom kag pag antos sang mga pumuluyo sa kamatayon sang demokrasya sang Pilipinas.

Bangod sini mabaskog nga ginakondenar sang ila hanay ang indi makataronganon nga layi nga ila gina kabig nga kuntra pumuluyo nga patakaran kag pag bayolar sa tawhanon nga kinamatarong sa palaaboton.

Subong nga hapon sang nag patigayon ang nag kalain-lain nga grupo sang rally sa Bacolod kontra Anti-Terror Act.

Gin-abi-abi kag ginpasalamatan sang Philippine Army ang pagpasar sang Anti-Terrorism Law.

Suno kay 3rd Infantry Division (ID) Spokesperson Army Captain Cenon Pancito III, ang layi ang makabulig sa mga otoridad sa pagtapna sang terorismo ukon kalakasan sa pungsod Pilipinas.

Nagapati si Pancito nga naathagan na ang publiko sa tinutuyo sang gobyerno sa pagpasar sang amo nga layi.

Ginpasiguro ni Pancito nga indi pag-abusuhon sang mga otoridad ang amo nga layi kag ginpaathag nga protektado sa gihapon ang tawhanon nga kinamatarong sang tanan.

Liwat nga ginhangkat ni Pancito ang mga grupo nga nagapamatok sa amo nga layi nga tun-an sang husto ang kada probisyon agud mahangpan ang kaundan kag tinutuyo sini.

Suno kay Pancito mayorya sang publiko ang nagasuporta sa Anti-Terrorism Law kag nagpalayag nga kun mahimo untatan na sang mga militante nga grupo ang pagpalapta sang sala nga interpretasyon sa amo nga layi. | Aksyon Alvin Grava, Aksyon John Diaz

MORE STORIES:

LATEST NEWS

LIKE US ON FB

error: Ooops... You are not authorized to copy this content.

YOU MAY ALSO READ: