Indi trabaho sang syudad nga mangin komportable ang tanan kundi trabaho sang syudad nga mangin safe ang tanan.
Ini suno kay Councilor Renecito Novero, chair sang Quarantine Center Action Team, angut sa reklamo sang mga returning OFWs nga indi sila komportable sa ila gina tiniran samtang naga paidalum sa 14-day mandatory quarantine.
28 ka mga returning OFWs ang nag abot sa Bacolod kag sila ang temporaryo nga gin patiner sa Graciano Lopez Jaena Elementary School nga isa sa mga quarantine centers sang syudad.
Ang mga duha ka OFWs ang gina butang sa isa ka room nga may ara sang divider kag gina reklamo man ang mahigko nga comfort room.
Nagapanawagan ang mga returning OFWs sa LGU sang Bacolod nga akomodahon sila sa isa ka pasilidad nga aprobado sang DOH kag Bureau of Quarantine Standards.
Luyag sang mga returning OFWs nga mag sapol sa tanan nga ahensya nga imbolbado sa ila nga pag pauli para ang ini nga isyu ang masolbar.
Suno kay Novero, natural nga mag reklamo ang mga returning OFWs ilabi na nga sila ang una nga gin-house sa mga hotel sa Manila nga gin-organize sang OWWA kag ila private employer.
Gin paathag ni Novero, ila gin himo ang tanan apiesar nga malip-ot nga notisya lamang ang gin hatag sa Bacolod angut sa pag abot sang mga OFWs.
Suno sa konsehal, ang protocol kuntane, ang OWWA ang maga hulat sang letter of acceptance nga preparado na ang syudad sa pagbaton sa mga returning OFWs.
Nag pangabay si Novero sa tanan nga mangin kabahin sang solusyon sang sa mangin kabahin sang problema.
Nag pangayo naman sang pasaylo si Vice Mayor El Cid Familiaran, chairman sang Bacolod Inter-Agency Task Force against Covid-19, sa mga returning OFWs nga temporaryo nga gin patiner sa amo nga buluthuan
Suno kay Familiaran, hinali lang gin pabalo ang LGU sang Bacolod kag Negros Occidental nga may maabot nga OFWs rason nga wala naka preparar ang syudad.
Dugang pa ni Familiaran, na inspect sang health authorities ang quarantine center antes ini gin pausar sa mga returning OFWs.
Suno sa Bise-Alkalde, gina himo sang syudad ang tanan nga masarangan kag gina paabot nga madamo pa ang returning OFWs nga natalana nga mag balik sa syudad.
Suno kay Familiaran, wala gina recommend sang CHO ang Regional Evacuation Center sa Brgy. Vista Alegre bilang quarantine facility bangud may mga protocol nga dapat sundon.
Suno sa Bise-Alkalde, ang pasilidad ang pavillion type, wala sang individual nga kwarto kag ang design sini ang maayo sa mga biktima sang sunog kag pagbaha.
Sa facebook post ni Congressman Greg Gasataya, nag suhestyon ini nga re-evaluate sang DOH ang evacuation center nga posible pwede mahimo bilang quarantine facility.
Suno sa Kongresista, mas maayo man kon i-modify ang pasilidad para mangin Covid-19 compliant facility.
