Nag-gradwar ang 70 ka miembro sang Philippine National Police (PNP) gikan sa Negros Occidental Police Provincial Office (NOPPO) kag Bacolod City Police Office (BCPO) sa napulo ka adlaw nga training sang Drug Abuse Prevention Education (DAPE) kag Drug Abuse Resistance Education (DARE).
Suno kay PDIR Cedrick Train, Director sang DHRDD sa Camp Crame, gin training ang mga pulis kon paano magtudlo sa mga kabataan nga likawan ang ilegal nga droga kag iban pa nga makahalit sang ila buwas damlag.
Ini ang maga-umpisa sa mga eskwelahan sa elementarya kag high school masunod nga simana.
Ini ang patigayonon sang PNP sa bulig man sang Department of Education (DepEd), agud maintiendihan sang mga kabataan ang indi maayo nga madulot sa ila sang ilegal nga droga.
Dugang ni Train, agud indi mabudlayan ang mga kapulisan sa amo nga trabaho, ila ginpakamaayo nga pili-on man ang pulis nga naka-gradwar sa kurso nga Edukasyon.
Isa sa dinapit nga bisita sa graduation amo si Senador JV Ejercito sa diin nagpanginbulahan ini sa mga nagradwar kag naghatag sang iya inspiration message sa kapulisan.