PROVINCIAL ADMINISTRATOR NAGPANUGYAN SA MGA EMPLEYADO SANG KAPITOLYO NGA MAGPA SWAB TEST KON MAY MABATYAGAN NGA SINTOMAS SANG COVID-19

Share on facebook
Share on google
Share on pinterest
Share on twitter
Share on print

Gin-abisohan sang gobyerno probinsiyal sang Negros Occidental  ang mga provincial capitol employees nga nagabatyag sintomas sang COVID-19  nga magpakuha sang RT-PCR test.

Ini kasunod  sa pagdamo sang mga empleyado sa  kapitolyo probinsiyal nga nagpositibo sa virus.

Suno kay Provincial Administrator Atty. Rayfrando Diaz II,  nag-estorya  na sila ni Provincial Health Officer Dr. Ernell  Tumimbang agud pangabayon ang mga administrative officers sa nagkalain-lain nga mga opisina,  nga usisaon kun sin-o nga mga empleyado ang nag-file sang sick-leave  bangud sa malain nga ginabatyag.

Ginpanugyan man sa  mga empleyado nga masami naga ‘field work’, nga likawan ang pagkadto sa  mga banwa kag syudad  nga may madamo nga aktibo  nga kaso sang Covid-19. Sa datos sang Provincial Incident Management Team (PIMT) tubtob Mayo 2, 2021, nagalab-ot sa 2,224 ang Covid-19 active cases.

Ang mga lugar  nga may madamo nga kaso amo ang San Carlos – 343, La Carlota – 185, Himamaylan – 140, Sipalay – 139, Bago – 118, Silay – 112, kag Kabankalan – 109. | Aksyon Marlon Genovea

TASK FORCE DISIPLINA MAGAPAHAMTANG MARKINGS KAG MAGA SCAN BAC-TRAC SA NAGAPILA SA COMELEC BACOLOD

Maga pahamtang sang markings para sa social distancing kag scanning sang BacTrac ang Task Force disiplina sa talatapan sang COMELEC umpisa sa Lunes, Mayo 10.

Suno kay Wilfredo Taba Geolingo Action Officer sang Task Force, tuyo sini nga mapunggan ang problema angut sa gina kabalak-an nga pagtaas sang kaso sang COVID 19.

Dugang pa ni Geolingo, mismo ang Malacañang nag mando sa tanan nga mga LGU sa pagpatuman sang hugot nga implementasyon sang amo nga regulasyon.

Gin klaro man sini nga magluwas sa Task Force disiplina, may yara man sang pila ka mga miyembro sang kapulisan nga maga bulig para sa amo nga kampanya. | Aksyon Art Tayhopon

APAT KA MGA KARABAO PATAY MATAPOS NAIGO SANG KILAT SA BARANGAY BACONG, BAGO CITY

Patay ang apat ka mga karabao sang Pamilya Dellosa matapos naigo sang kilat sa Purok Kalubihan, Barangay Bacong, syudad sang Bago, Sabado, Mayo 8.

Sa interview sang Aksyon Radyo kay Carlo Dellosa, 18 anyos, ang apat ka karabao ang yara sa idalum sang kawayan sang natabo ang insidente.

Suno kay Dellosa, mga las 12 kaina sang udto sang nag ulan sa ila nga lugar, nag init, antes nga nag igo ang makusog nga kilat.

Nagapati si Dellosa nga naigo sang kilat ang apat nila karabao bangud nasunog ang pila ka bahin sang lawas sang sapat.

Nagakasubo ang Pamilya Dellosa sa nadangatan sang karabao nga nagabulig sa ila sa uma. | Aksyon Dale Salazar

MORE STORIES:

LIKE US ON FB

error: Ooops... You are not authorized to copy this content.