Ginpirmahan na ni Governor Bong Lacson ang heightened alert advisory bilang preparasyon sa tropical storm Auring sa Negros Occidental.
Suno kay Provincial Disaster Management Program Division (PDMPD) Head Zeaphard Gerhart Caelian, ginpatigayon na ang pre-disaster risk assessment. Sa idalom sang heightened alert, gina imbentaryo ang tanan nga mga kagamitan sa disaster, kag gina review ang contingency plan.
Dugang pa ni Caelian, pagahambalan man sa patigayunon nga Provincial Development Council (PDC) meeting sa kapitolyo ang preparasyon, kag posible nga irekomendar ang pagpasaka sa alert level sa blue alert status.
Wala man ginadula ni Caelian ang posible nga pagbaskog sang bagyo Auring bilang isa ka severe tropical storm. Suno kay Caelian, ang bagyo paabot nga magalaslas sa Negros Occidental sa Martes ukon Miyerkules sa masunod nga semana.
Alerto man ang mga katapo sang Philippine Coast Guard sa probinsya sang Negros Occ. kasunod sa pagsulod sa Philippine Area of Responsibility sang bagyo Auring.
Suno PCG-Negros Occ. head Captain Ludovico Librilla Jr. iya na ginmanduan ang mga Substation Commanders upod sa ila mga personnel nga mangin mabinantayon sa ila Areas Of Responsibility kalakip na ang pag-alerto sa ila Quick Response Team kag mangin handa sa pagresponder sa tion sang pagbaha.
Nagapangabay man si Librilla sa mga magagmay nga mangingisda nga likawan ang pagpalawod samtang malain pa ang panahon.
Samtang, naka-alerto man ang Negros Occidental Police Provincial Office ukon NOCPPO sa pagsulod sang bagyo Auring.
Suno kay NOCPPO Deputy Spokesperson PLt Abegael Donasco, naghatag na sang direktiba si NOCPPO Director PCol Romy Palgue sa mga hepe sang kapulisan.
Nakahanda naman ang mga kagamitan nga usaron kun kinahanglanon.
Nahibal-an, nakasentro ang mata ni Auring sa Visayas nga ginapaabot sini nga semana. | Aksyon Alvin Grava, Aksyon Bryan Morden
