PILA KA KILALA NGA NGALAN SA PULITIKA, NAG FILE NA SANG COC

Share on facebook
Share on google
Share on pinterest
Share on twitter
Share on print

Nag file na sang ila kandidatura sa Commission on Elections sanday anay Gobernador Genaro “Lim-ao” Alvarez bilang kongresista sa ika-anom nga distrito, kag reelectionist 4th District Cong. Juliet Marie Ferrer.

Si Alvarez ang nag file sa idalom sang Nationalist Peoples Coalitin.

Siya amo ang una nga kandidato nga nag file sang iya certificate of candidacy ukon CoC sa una man nga adlaw sang filing subong nga Oktobre 11.

Siya ang gin-updan ni Vice Governor Eugenio Jose Lacson kag bata sini nga si Deputy House Speaker Mercedes Alvarez.

Una nga nagpapili si Alvarez bilang provincial board member sadtong 1980’s, antis nangin kongresista, kag bise gobernador sang Negros Occidental.

Siya ang nagpapili bilang gobernador sadtong tuig 2013 nga eleksyon, apang napierde kay Governor Alfredo Maranon Jr.

Si Ferrer ang nagfile naman sa idalom sang National Unity Party/United Negros Alliance .

Siya ang gin-updan naman sang iya bana nga si anay Cong. Jeffrey Ferrer , Governor Maranon, kag mga kaalyado nga alkalde kag board members .

Sa karon wala pa mahibaluan kun sila ang may maka-engkuwentru , tubtub nga wala pa matapos ang deadline sa filing sang CoC sa Oktobre 17.

Samtang, dungan nga nag-file sang ila kandidatura ang mga kandidato sang Partido Kusog Talisaynon sa siudad sang Talisay subong nga hapon.

Ini ang ginpamunuan ni Mayor Neil Lizares nga liwat magapapili bilang alkalde, kag Vice Mayor Samuel Siote nga magakandidato man liwat sa amo nga posisyon.

Suno kay Lizares, anom sa ila mga kandidato sa pagka-kunsehal ang mga incumbent kag liwat nga magapapili, tatlo ang mga bag-uhan kag isa ang nangin three-termer councilor man sang siudad.

Antis mag-file, sila ang nagtipon sa puluy-an sang alkalde kag nagpalayag sang ila mga plano sa atubang sang ginatos ka mga sumalakdag.

Si Lizares ang kuntani engkuwentruhon ni anay Mayor Eric Saratan, apang naareglo paagi sa merger sang United Negros Alliance kag Love Negros.

MANGUNGUMA PATAY MATAPOS GINTIRO SANG GWARDYA

Patay sang gindangat sa Hinigaran Emergency Clinic ang isa ka mangunguma sang luthangon sa Hacienda Bail, Barangay Tuguis, Banwa sang Hinigaran kahapon, Myerkules sang aga.

Ang biktima ginkilala nga si Julius Denagiba, 35 anyos, pamilyado kag nagapuyo sa amo man nga lugar, samtang ang suspetsado nga gwardiya ginkilala kay Rogel Belonio, 55 anyos, pamilyado kag nagapuyo sa Barangay Singcang Airport, syudad sang Bacolod.

Suno kay PMaj Jake Barila, hepe sang Hinigaran PNP, nagpaharab sang karbaw ang anak kag hinablos ni Denagiba malapit sa duta nga ginabantayan ni Belonio.

Pila ka minutos nag-abot ang biktima sa lugar kag nagbaisay sila sang suspetsado tubtob nga ginluthang ini gamit ang 12 gauge shotgun.

Naka-angkon sang malubha nga pilas si Denagiba nga gindeklarar nga patay sa clinic sa Hinigaran.

Padayon pa ginapangita si Belonio kag isa pa ka gwardiya nga upod sini nga si Eric Soriano sang San Isidro, Banwa sang Pontevedra tanan sa idalum sang RHN Security Agency.

Ang biktima isa lang sa madamo nga benepisyaryo sa amo nga duta nga ginapanag-iyahan sang pamilya Magallanes, apang wala pa sang CLOA. 

Dugang ni Barila, bangud nga benepisyaryo ini may daan na nga indi pag-intindihanay ang nga blue guards kag ang mga bepisyaryo sang duta nga ila ginabantayan.

POLICE STATION 9 NA AKTUHAN ANG MGA PAMATAN-ON NGA NAGPAMASYA SA MGA MOTORISTA SA BARANGAY SUM-AG

Ginkumpirmar sang kapulisan nga may grupo sang mga pamatan-on nga nagpang basya sang tubi sa mga motorista nga nagalabay sa taytay sang Barangay Sum-ag syudad sang Bacolod kadungan sang kapiestahan ni San Juan de Bautista, kaina sang udto, Hwebes.

Suno kay Police Station 9 Commander Police Major Ritchie Gohee, naga-inspeksiyon siya kag ang mga police personnel sang nakabaton sang tawag nga may mga kabataan nga may bitbit sang balde nga may unod sang tubi kag ginabasya sa mga naganilabay.

Ginrespondihan sang kapulisan ang lugar kag naaktuhan ang mga pamatan-on nga nagnilumpat sa suba matapos makita ang patrol sang kapulisan.

Kun madumduman, nagpagwa sang mando si Mayor Evelio Leonardia nga nagadumili sang basyahanay sang tubi kag iban pa nga aktibidad may angut sa kapiestahan ni San Juan de Bautista.

Samtang, ginpahayag naman ni Gohee nga compliant ang mga resort kag restaurant owners sa Barangay Punta Taytay syudad sang Bacolod.

Samtang, lubos nga gin pasalamatan ni Task Force Disiplina Action Officer Wilfredo Taba Geolingo ang gin pakita nga kooperasyon sang publiko angut sa selebrasyon sang ka piyestahan ni San Juan de Bautista.

Suno kay Geolingo, base sa ila gin patigayon nga operasyon kag monitoring sa mga beach resort lakip na sa mga kapehan kag kalan-an sa Barangay Granada kag Alangilan, gin klaro sini nga wala sila sang nakita nga ano man nga bayolasyon.

Dugang pa ni Geolingo, may yara gid man sang pila ka mga kabataan ukon mga menor de edad nga ila gin saway matapos magpaligo sa baybay ilabi na sa mga Barangay nga may yara sang nasakupan nga coastal area, apang ini nga concern ang ila gilayon naman nga gin aktuhan paagi sa pagpalab-ot sa atensyon sang natungdan nga mga ginikanan.| Aksyon John Diaz, Aksyon Art Tayhopon

MORE STORIES:

LIKE US ON FB

error: Ooops... You are not authorized to copy this content.