Nagpasiguro ang mga matag-as nga opisyal sang Philhealth nga ila bayaran ang Interim Reimbursement Mechanism ukon IRM nga 1.8 billion pesos sa mga natungdan nga mga hospital sa Western Visayas.
Suno kay Congressman Greg Gasataya, ini matapos nga iya ginpalab ot sa mga opisyal sang PhilHealth sa hearing sang kongreso sang lunes nga adlaw nga i-release ang IRM sa mga hospital sa Region 6.
Dugang pa ni Gasataya, apiesar nga may yara sang mando ang Philhealth nga temporaryo nga i-untat ang IRM sa mga hospital, pero sa amo nga hearing, nag -commit ang ahensya nga ihatag ang IRM sa mga hospital sa rehiyon para ibulig sa operasyon sang hospital karon nga may pandemic.
Sa record sang Kongresista, 33 ka mga private kag government-owned hospital sa Western Visayas nga accredited sang Philhealth ang may yara sang kuluhaon nga IRM.
Gin ehemplo ni Gasataya ang Corazon Locsin Montelibano Memorial Regional Hospital nga sadtong Marso pa ang proseso sang ila requirements para sa IRM nga nag dangat sa 41 milllion pesos.
Suno sa Kongresista, ginpahayag ni Congressman Mike Defensor, naga panguna sa imbestigasyon sang Kongreso sa gin alegar anomaliya sa PhilHealth, nga kon may yara sang wala paghangpanay ang Regional Office kag National Office dapat ila ini resolbahon ilabi na nga may gina pangatubang nga pandemic.
Samtang, ginapaabot nga aprubahan sang Sangguniang Panlungsod ang resolusyon nga nagahingyo sa PhilHealth nga bayaran ang tanan nga claims sang mga hospital sa syudad sang Bacolod.
Sa interview sa Aksyon Firing Line kaupod ni Aksyon Bryan Morden, ginpahayag ni Bacolod City Administrator Em Ang, nga ang isyu sa IRM ang nabuksan man sa pagsapol sang mga opisyal sang syudad, grupo sang mga doktor kag iban pa nga natungdan nga ahensiya kag sektor kahapon nga adlaw.
Suno kay Ang, gintalakay sa pagsapol ang impormasyon nga ang mga hospital sa Western Visayas amo lang ang wala nahatagan sang IRM.
Dugang pa ni Ang, magluwas sa IRM, ang PhilHealth may balayran pa nga masobra 134 million pesos nga claims sa Corazon Locsin Montelibano Memorial Regional Hospital, nga ginapaabot makabulig sa pagpaayo sang pasilidad kag pagbakal sang dugang mga medical equipments.| Aksyon Dale Salazar, Aksyon Ann Defensor
