Ginpanginwala sang Philippine Army ang aligasyon sang pila ka mga progresibo nga grupo nga sila ang sa likod sa pagpatay sa isa ka mangunguma sa Sitio Amian, Brgy. Tan-awan, syudad sang Kabankalan sadtong Setyembre 26.
Suno kay 3rd Infantry Division Internal Affairs Officers Army Major Cenon Pancito III, nasaksihan mismo sang mga opisyal sang barangay ang pagkuha sang bangkay ni Bernardo Guillen Sr. sa ginpatigayon nga retrieval operation.
Ginklaro man ni Pancito nga si Guillen ang wala ginpugutan sang ulo tuhay sa aligasyon sang Karapatan-Negros kag National Democratic Front.
Dugang pa ni Pancito, ginpabutyag sang asawa ni Guillen nga ini ang personal nga nagpalapit sa encounter site sa wala mahibaloan nga rasun.
Sa imbestigasyon sang Army nahibaloan nga ang napatay ang amay sang isa sa anum ka mga nadakpan nga rebelde tinalikdan nga bulan sa banwa sang Mabini sa probinsya sang Negros Oriental.
Bangud sang mga akusasyon, ginpabutyag ni Pancito nga disidido ang Philippine Army nga pasakaan sang kaso ang natungdan nga grupo. | Aksyon John Diaz