PDRRMO PLASTADO KAG NAKAHANDA SA POSIBILIDAD MGA PAGBAHA SA PILA KA MGA BANWA KAG SYUDAD SA PROBINSYA

Share on facebook
Share on google
Share on pinterest
Share on twitter
Share on print
Naka-plastar kag nakahanda na ang Provincial Disaster Risk Reduction and Management Office ukon PDRRMO sa posible rescue operations sa tion nga magtaas ang tubig sa pila ka mga lugar sa palibot sang probinsiya sang Negros Occidental. Suno kay PDRRMO Head Zeaphard Caelian, naka alerto sila sa tanan nga oras apesar nga indi man direkta nga maapektuhan sang bagyo Ompong ang Negros Occidental. Dugang pa ni Caelian, partikular nga ila ginatutukan amo ang mga siudad kag banwa sa sur nga amo ang naga-ekperyensiya sa karon sang mga pag-ulan. Pila sa mga na-mensyonar ni Caelian nga naga eksperyensiya sang pag-ulan amo ang banwa sang Don Salvador Benedicto, Isabela, Candoni, Cauayan, siudad sang Bago kag Bacolod. May panugyan man si Caelian sa mga residente nga nagaestar malapit sa suba kag baybayon ukon ang mga yara sa mga manubu nga lugar, nga labing mayo nga samtang amat-amat ang pagbaha, gilayon na lamang nga mag-evacuate agud malikawan nga mabiktima sang kalamidad.

PFIZER NGA BAKUNA SANG NEGROS OCCIDENTAL PAGAUSARON UMPISA HUNYO 28

1,000 ka mga persona kada adlaw ang target nga mabakunahan sang Pfizer-BioNTech COVID-19 Vaccine sa Negros Occidental.

Suno kay Provincial Administrator Atty. Rayfrando Diaz II, maga umpisa  ang pagbakuna   sa Hunyo 28  tubtub Hulyo 2, 2021  sa duha ka mga gindesignar  nga vaccination sites.

Ini amo ang Teresita L. Jalandoni Provincial Hospital sa syudad sang Silay    kag Negros Residences sa syudad sang Bacolod.

May 300 ka mga tawo ang target nga mabakunahan sa Silay kada adlaw, samtang 700 naman sa Bacolod.

Gin-athag ni Diaz nga may 2 lamang ka vaccination areas nga gintalana ang probinsiya, bangud diri nahamtang ang Ultra Low Freezer  para sa Pfizer vaccines.  | Aksyon Marlon Genovea

MANGUNGUMA PATAY MATAPOS GINTIRO SANG GWARDYA

Patay sang gindangat sa Hinigaran Emergency Clinic ang isa ka mangunguma sang luthangon sa Hacienda Bail, Barangay Tuguis, Banwa sang Hinigaran kahapon, Myerkules sang aga.

Ang biktima ginkilala nga si Julius Denagiba, 35 anyos, pamilyado kag nagapuyo sa amo man nga lugar, samtang ang suspetsado nga gwardiya ginkilala kay Rogel Belonio, 55 anyos, pamilyado kag nagapuyo sa Barangay Singcang Airport, syudad sang Bacolod.

Suno kay PMaj Jake Barila, hepe sang Hinigaran PNP, nagpaharab sang karbaw ang anak kag hinablos ni Denagiba malapit sa duta nga ginabantayan ni Belonio.

Pila ka minutos nag-abot ang biktima sa lugar kag nagbaisay sila sang suspetsado tubtob nga ginluthang ini gamit ang 12 gauge shotgun.

Naka-angkon sang malubha nga pilas si Denagiba nga gindeklarar nga patay sa clinic sa Hinigaran.

Padayon pa ginapangita si Belonio kag isa pa ka gwardiya nga upod sini nga si Eric Soriano sang San Isidro, Banwa sang Pontevedra tanan sa idalum sang RHN Security Agency.

Ang biktima isa lang sa madamo nga benepisyaryo sa amo nga duta nga ginapanag-iyahan sang pamilya Magallanes, apang wala pa sang CLOA. 

Dugang ni Barila, bangud nga benepisyaryo ini may daan na nga indi pag-intindihanay ang nga blue guards kag ang mga bepisyaryo sang duta nga ila ginabantayan.

MORE STORIES:

LIKE US ON FB

error: Ooops... You are not authorized to copy this content.