PB JARDIN PLANO MAG FILE SANG KASO BATUK SA PITO KA RESIDENTE SANG IYA BRGY

Share on facebook
Share on google
Share on pinterest
Share on twitter
Share on print

Disidido si Barangay Felisa Kapitan Ramon Jardin nga pasakaan sang kaso ang pito ka mga pumuluyo sang ila barangay matapos nga gin-ulamid ang iya nga ngalan sa isyu may angut sa Social Amelioration Program (SAP).

Suno kay Jardin, deritso nga nagpadangat sang reklamo ang mga ginarekamo nga pumuluyo sa DILG apang wala man lang ginpalab-ot siya personal ang reklamo.

Dugang pa ni Jardin, ginmitlang man sang isa sa pito ka mga tagreklamo ang iya nga ngalan sa interview sang mga katapo sang media.

Palayag ni Jardin, naguba na ang iya nga ngalan sa isyu nga wala sang kahilabtanan rasun kun ngaa nagdesisyon nga magpasaka sang kaso nga libel kag kaso may angut sa moral damages.

Indi pa matumod ni Jardin ang kaso nga ipasaka sa kada isa sa pito ka mga pumuluyo nga iya gin-aligar nagguba sang iya nga ngalan bangud nga ini sa karun ginatun-an pa sang iya nga abogado.

Gin pahayag man ni Jardin nga wala sang respeto ang mga naga reklamo matapos nga wala nagtambong sa ginpatigayon nga special session sa barangay

Suno kay Jardin, nabaton na sang mga natungdan ang sulat nga naga-imbitar sa ila agud istoryahan kag hatagan sang pagpaathag ang reklamo nga ila ginpadangat sa DILG.

Suno sa Kapitan, ang DILG-Bacolod mismo ang nagrekomendar kun mahimo magsapol ang barangay council nga gina-bug-usan sang mga anum ka mga kagawad kag ang Sangguniang Kabataan Chairman.

Ginklaro man ni Jardin, wala siya ang nagpatawag sa mga natungdan kundi ang barangay council gid lamang.

Nagpaathag ang sekretarya sang Barangay Felisa nga wala siya nangolekta sang 4,000 pesos sa pipila ka mga benepisyaryo SAP sa ila nga barangay.

Suno kay Stephen Jalando-on, wala sang kamatuoran ang mga akusasyon ni Rosamae Robles batuk sa iya bangud nga wala gid ini nakapadulong sa ila nga puluy-an agud nga magpangkolekta sang 4,000 pesos nga kwarta.

Dugang pa ni Jalandoon, masako ini sang Abril 22 kag gab-e na ini nagpauli matapos ginhikutar ang mga dokumento nga kinahanglanon sa pay-out kag wala man sang tiempo agud magpamalay-balay bangud nga madamo pasang ulubrahon sa ila nga barangay.

Dugang pa ni Jalando-on, nakibot na lamang ini sang nagpahibalo ang DILG nga may reklamo batuk sa ila kag nagrekomendar nga kun mahimo maistoryahan kag masolbar sa barangay ang amo nga isyu.

Ginbulgar man ni Jalandoon nga magkumarihay sila sang tagreklamo kag nagapuyo sa pareho nga purok apang wala man personal nga nagpadangat sa iya sang reklamo.

Sa pihak sang natabo, ginpahayag ni Jalandoon nga bukas ini kun luyag ni Robles nga makig-istorya sa iya. | Aksyon John Diaz

MORE STORIES:

error: Ooops... You are not authorized to copy this content.