“Recovered” na ang status sang Covid-19 patient no. 1 sang Negros Occidental matapos magnegatibo ang duha ka mga resulta sang swab test sa iya.
Ini amo ang 41 anyos nga taga banwa sang EB Magalona, nga Covid-19 patient no. 15 sa Western Visayas kag nagpositibo sa virus sadtong Marso 24 .
Siya ang may travel history sa Manila kag syudad sang Davao kag ginbulong sa Teresita Jalandoni Provincial Hospital sa syudad sang Silay.
Sa presentasyon ni Provincial Health Office Nurse Francis Christian Grupe sa Provincial Inter-Agency Task Force COVID-19 Update, may tatlo na lamang ka mga request test sang positive cases ang ginahulat.
Ini ang kalakip sa 107 ka mga pending results nga ginahulat sang Negros Occidental, halin sa Western Visayas Medical Center.
Samtang, nakarecord sang duha (2) ka mga Covid-19 probable cases ang probinsya.
Suno kay Grupe, ini ang naghalin sa syudad sang Bago kag Kabankalan.
Suno kay Grupe, ini nga mga pasyente ang nagpositibo sa Rapid Diagnostic Test nga ginpatigayon sa Doña Corazon Locsin Montelibano Memorial Regional Hospital.
Ginklaro ni Grupe nga ‘inconclusive’ ang resulta sang test, bangud ini ang kinahanglan pa sang Reverse Transcription Polymerase Chain Reaction ukon (RT-PCR) halin sa national ukon subnational coronavirus reference laboratory, ukon Department of Health (DOH)-certified laboratory testing facility para sa confirmatory testing.
Abril 10, 2020, sang gingamit sang DOH ang suspect, probable kag confirmed cases bilang bag-o nga classification sa mga pasyente nga gina screen sa COVID-19. | Aksyon Marlon Genovea
