PAG-AKTO NI DOTr SEC.TUGADE SA PROBLEMA ANGUT SA TRANSPORTASYON SA BACOLOD MATAPOS GINPAIDALOM SA MECQ GINKALIPAY NI CONG.GASATAYA

Share on facebook
Share on google
Share on pinterest
Share on twitter
Share on print

Ginkalipay ni Bacolod City Lone District Congressman Greg Gasataya ang positibo nga pag akto ni Department of Transportation Secretary Arthur Tugade angut sa iya gin palab-ot nga problema sang mga Bacolodnon kasunod sang gin patuman nga Modified Enhance Community Quarantine ukon MECQ.

Suno kay Gasataya, naka baton na ini sang tawag kagab-i sa Regional Director sang LTO nga nagpasiguro sang naga kaigo nga pag akto paagi sa bulig kag kooperasyon sang Land Transportation Franchising and Regulatory Board ukon LTFRB.

Dugang pa ni Gasataya, dako nga problema sang publiko ang kawad-on sang salakyan ilabi na ang mga naga padulong sa ila tagsa ka mga trabaho kada adlaw.

Sa nahibaluan nga sa idalum sang MECQ nga regulasyon, suspendido ang operasyon sang tanan nga mga public transportation sa syudad.

BARANGAY 18 MAY ARKILAHAN NGA LUGAR PARA TEMPORARY SHELTER SANG MGA WATCHER

Arkilahan sang Brgy. 18 council ang isa ka bakante nga lokal agud himuon nga temporary shelter para sa mga watchers sang mga pasyente sang Corazon Locsin Montelibano Memorial Regional Hospital (CLMMRH).

Ang arkilahan nga lugar ang nahamtang sa 2nd Cordova Road, Brgy. 18 syudad sang Bacolod kag may kadakuon nga 12×50 square meters.
Suno kay Kapitan Madeline Diaz sang Barangay 18, isa ka indi magpakilala nga indibidwal ang nagpakig-angut sa iya agud magbulig sa mga watchers pinaagi sa paghatag sang libre nga ilistaran.

Magapahamtang man sang 50 ka mga folding beds kag ulunan ang barangay agud indi na mabudlayan pa nga magpangita sang gamit ang mga watchers.

Dugang pa ni Diaz, wala labot sang bulig pinansyal magahatag man sang duha ka sako sang bugas ang nagdonar.

Nagalaum si Diaz nga magkooperar kag mangin responsable ang mga watchers. | Aksyon John Diaz

KAPIN 3K KA PAMILYA NGA GINLOCKDOWN SA BACOLOD, MAKABATON SANG AYUDA

Ginsumiter na sang Department of Social Services and Development ukon DSSD Bacolod sa DSWD Region 6 ang listahan sang mga pigado nga mga pamilya nga na apektuhan sang lockdown nga makabaton sang 6,000 nga ayuda sa idalum sang Bayanihan 2.

Ini nga mga pamalay ang ginlockdown ukon gin sealed off humalin Setyembre 11 tubtob Disyembre 29, 2020.

Suno kay Pacita Tero, pamuno sang DSSD, kapin 3,000 households ang benepisyaryo sang amo nga programa sa Bacolod.

Sa karon, nagahulat ang DSSD sang komunikasyon gikan sa Region 6 angut sa proseso kag schedule sang payout.

Samtang, gin pahayag ni Tero, nga may pila pa ka mga ‘waitlisted’ sa Bacolod ang ginapaabot nga magbaton sang 6,000 nga ayuda sa idalum sang Bayanihan 2. Ang waitlisted amo ang mga pigado nga pamilya pero wala nalakip sa first kag second tranche sang Social Amelioration Program. | Aksyon Dale Salazar

MORE STORIES:

LIKE US ON FB

error: Ooops... You are not authorized to copy this content.