OCEAN JET 9 KAG 12 WALA NALAKIP SA BALIK BYAHE SA HUNYO 16

Share on facebook
Share on google
Share on pinterest
Share on twitter
Share on print

Ginkumpirmar ni PCG-Negros Occ. Commander Jansen Benjamin nga wala nalakip sa  biyahe nga Bacolod padulong sa Iloilo kag vice-versa sa Hunyo 16, 2020 ang Ocean Jet 9 kag 12.

Suno kay Benjamin, nakabaton ang iya ahensya sang sulat gikan sa tagdumalahan sang ocean jet nga ginpaidalum sa “dry dock” ang duha ka mga fast craft sa syudad sang Cebu.

Dugang pa ni Benjamin, tubtub karon ginahulat pa ang kumunikasyon gikan sa duha pa ka mga fast craft  matapos ginkasugtan sa ila pagsinapol sadtong Hunyo 8, 2020 nga magapadala sang sulat ang mga shipping company sa ila ahensya antes pormal nga makabiyahe sa Hunyo 16.

Ginklaro man ni Benjamin nga Hunyo 15 ang katapusan nga adlaw sang MGCQ apang ang mga Authorized Outside Residence kag Locally Stranded Passengers lamang ang ginapahanugutan.

MAG-LOLO PILASON MATAPOS NABUNGGUAN SANG MOTORSIKLO

Pilason ang mag-lolo matapos nabunggoan ang ila ginasakyan nga trisikol sang motorsiklo sa Economic Highway sakop sang Barangay Cabug syudad sang Bacolod, kagab-i, Dominggo.

Ginbunggo-an sang motorsiklo nga ginamaniho ni Rirzard Bionat, 31 anyos sang Deca Homes Barangay Cabug ang trisikol nga ginadala ni Elmer Delgado, 56 anyos sang Purok AC-Yulo Barangay Sum-ag syudad sang Bacolod.

Upod ni Delgado sa trisikol ang iya apo nga si Kheite Gerence Petalla nga naka-angkon sang minor injury.

Gindala sa Corazon Locsin Montelibano Memorial Regional Hospital si Delgado upod sang iya apo nga si Petallar.

Naka-angkon man sang pilaso si Bionat matapos matumba sa ginasakyan niya nga Honda Scooter.

Suno kay Police Corporal Roland Abong, traffic investigator sang Police Station 9 nakasangit sa likod sang trisikol ang motorsiklo ni Bionat rason sang aksidente. | Aksyon Eric Magbanua

LIMA KA PERSONNEL SANG NBI-BACOLOD, NAGPOSITIBO SA COVID-19

Temporaryo nga ginpasira ang talatapan sang National Bureau of Investigation (NBI) Bacolod, matapos nagpositibo sa Covid-19 ang lima ka mga personnel sini.

Sa interview sang Aksyon Radyo Bacolod ginpahayag ni NBI Bacolod Head Atty. Renoir Baldovino, 25 ka mga personnel ang ginpaidalom sa RT-PCR swab tests nagligad nga Biyernes kag Sabado , kag lima sa mga ini nga lunsay mga babaye ang nagpositibo sa Covid-19.

Bangud sini suno kay Baldovino, ginmando sang Local Inter-Agency Task Force (LIATF) Bacolod ang pagpasira sang NBI office, agud mapaidalom sa disinfection.

Dugang pa ni Baldovino, napaidalom na sa isolation ang lima ka mga nagpositibo sa quarantine facility sang syudad sa Brgy. Villamonte.

Ginpatigayon naman ang contact tracing sa mga naka close contacts sang Covid-19 positive.

Nag umpisa ang pagpasira subong nga Lunes Enero 18 tubtub Enero 22, 2021. Magabalik ang operasyon sang NBI Bacolod sa Enero 25. | Aksyon Marlon Genovea

MORE STORIES:

LIKE US ON FB

error: Ooops... You are not authorized to copy this content.