Nanawagan si Congressman Greg Gasataya sa publiko nga suportahan ang hampang sang Bacolod Master Sardines kontra sa Cebu City Sharks sa MPBL 2019 sa Huwebes nga adlaw, Oktubre 17 takna las 9 sang gab-i sa USLS coliseum.
Sa press conference, gin siling ni Gasataya, nga ini ang tion para mapakita ang suporta sa team sang Bacolod kag para liwat nga mabalik ang rivalry sang Bacolod kag Cebu sa sport nga basketball.
Dugang pa ni Gasataya, mabakod ang team sang Cebu kag naga -improve man ang kada team sa MPBL.
Gina kabig naman ni Coach Vic Ycasiano nga crucial ang ini nga hampang ilabi na nga patas sa standing ang Bacolod kag Cebu nga may anum ka daug kag 10 ka pierde sa Group B.
Gin hingadlan ni Ycasiano ang apat ka bag-o nga mga players sang Bacolod nga sanday Mark Dela Cruz nga gikan sa Brgy. Villamonte, Mar Villahermosa, Jessie Saitanan kag Jerick Canada. Suno pa kay Ycasiano, ‘not in our house’ ang ila nga battlecry sa adlaw sang hinampang.
Si Senador Manny Pacquiao nga founder sang MPBL ang isa sa linibo ka mga basketball fans nga magalantaw sa adlaw sang hampang. | Aksyon Dale Salazar
