Ipatuman sang probinsya sang Negros Occidental kag syudad sang Bacolod ang apat ka adlaw nga weekend time out sa Agosto 28 tubtob Agosto 31 para makapatigayon sang massive testing.
Ini nga tikang ang gin presentar sang duha ka mga matag-as nga lideres sang probinsya kag syudad sang Bacolod paagi sa joint press conference nga gin patigayon kaina sang aga.
Suno kay anay 3rd District Congressman kag Provincial Consultant Albee Benitez, ini nga inisyatibo ang naga tuyo nga ma determinar ang kadamuon sang mga indibidwal nga apektado sang amo nga pandemiya.
Dugang pa ni Benitez, ang weekend timeout ang maga resulta sa pagpatuman sang lockdown para sa pag pagpatigayon sang massive testing.
Suno kay Benitez, target nga mapaidalum sa mass testing ang 10,000 ka mga indibidwal sa diin 5,000 ang maga halin sa Bacolod kag 5,000 ang gikan sa probinsya.
Sa massive testing, ipatuman ang lockdown sa Bacolod sa Agusto 28 tubtob 29 samtang lockdown man sa Silay, Talisay, Bago kag Murcia sa Agusto 30 tubtob 31.
May yara sang Special Task Force nga plano patukuron para mag facilitate sang testing.
Naga pati si Benitez nga ang massive testing kag weekend timeout ang isa sang naga panguna nga tikang agud mahibaluan ang aktwal nga sitwasyon sang Bacolod kag probinsya kon kaso sang COVID 19 ang paga hambalan.
Padayon man ang koordinasyon sang iya talatapan sa lima ka mga molecular laboratories sa Bacolod kag probinsya agud masiguro nga maka pa gwa sang resulta sang test sang 24 oras.
Ginklaro ni Benitez nga may yara sang isa ka opisyal sa nasyunal nga iya na kontak kag nagpasiguro nga maga bulig para sa pag provide sang kinahanglanon nga mga consumables ukon kagamitan para sa plano nga pagpatigayon sang massive testing.
Suno kay Benitez, maga buligay man ang Bacolod kag probinsya para ma aktuhan ang iban pa nga mga concern kag kinahanglanon.
Kinahanglanon man sini ang kooperasyon sang tanan nga mga LGU sa tion nga gina implementar ang amo nga programa ilabi na ang estrikto nga pagpatuman sang lockdown kag pag bantay sang mga border area agud malikawan ang padayon nga pag lagaw sang publiko. | Aksyon Art Tayhopon