Padayon pa ang pagtipon sang dugang nga mga ebidensya sang National Bureau of Investigation (NBI)-Bacolod sa pagpasaka sang kaso sa mga suspetsado sa likod sang “gold online shop scam”.
Sa interview sang Aksyon Radyo Bacolod kay NBI-Bacolod Head Atty. Renoir Baldovino, ginkumpirmar sini nga may 42 na ka mga nagpakilala biktima sang amo nga scam kag nagpabutyag nga desidido ang mga ini nga magpasaka sang kaso.
Ugaling suno kay Baldovino, may yara pa nga wala makahatag sang ila affidavit kag iban pa nga ebidensya. Pito sa 42 ka mga biktima sang scam ang mga manunudlo.
Ginkumpirmar man ni Baldovino nga lima ka mga persona ang ginatudlo suspetsado sa scam kalakip na ang negrense nga ginasiling amo ang nagbaton sang investment sa online kag ang gina-aligar principal suspect nga tumandok sang Agusan.
Sa inisyal nga report, nagdangat sa 35, 387, 500 ang kabilogan nga investment sang mga nauna nga nagpakilala biktima.
Nagpanugyan si Baldovino sa iban pa nga biktima nga gilayon magpadulong sa talatapan sang NBI agud mahikutar ang pagpasaka sang kaso.
Kaso naman nga syndicated estafa ang ipasaka sa mga suspetsado. Liwat naman nga nagpahanumdom si Baldovino sa publiko nga maghalong sa mga transaksyon ilabi na kun imbolbado ang kwarta. | Aksyon John Diaz
