NBI BACOLOD GINA PREPARAR NA ANG KASO BATUK SA TATLO KA MGA TAWO NGA GIN ALEGAR SUSPECT SA RICE INVESTMENT SCAM; ISA SA MGA SUSPEK NANGINWALA

Share on facebook
Share on pinterest
Share on twitter
Share on print

Ginapreparar na sang NBI-Bacolod ang mga dokumento sa pagpasaka sang kaso batuk sa tatlo ka mga persona nga gin-aligar suspetsado sa likod sang multi-million rice investment scam sa syudad sang Bacolod.

Sa interview sang Aksyon Radyo Bacolod ginkumpirmar ni NBI-Bacolod Head Atty. Renoir Baldovino nga duha ka mga babaye nga legal ang edad ang primary suspects apang may isa pa ka menor de edad nga naulamid ukon naggwa ang ngalan nga may kahilabtanan sa rice investment scam.

Suno kay Baldovino, 30 ka mga tagreklamo ang nagpadangat sang reklamo sa NBI-Bacolod kag gilayon man nila ginhatagan sang aksyon.
Nagalaum si Baldovino nga mas madamo pa ang magapadulong sa ila nga talatapan kag magapasaka sang panumbungon bangud basi sa ila imbestigasyon nagagwa nga masobra 100 ang nag-invest sa mga ginatudlo suspetsado.

Kaso nga large scale estafa in relation to Republic Act No. 10175 ukon Cybercrime Prevention Act of 2002 ang ipasaka batuk sa mga suspetsado.
Palayag ni Baldovino, mahimo nga mangin non-bailable ukon wala sang piyansa kag reclusion perpetua ang penalidad nga ipatong sa mga suspetsado kun mapamatud-an nga guilty sa kaso bangud sang kantidad nga imbolbado sa investment scam.

Samtang, ginklaro sang isa sa mga ginatudlo suspetsado sa likod sang multi-million rice investment scam nga isa lamang siya ka investor.

Sa interview sang Aksyon Radyo Bacolod kay Jennifer Nierves, 29 anyos sang Barangay Estefania syudad sang Bacolod ginpanginwala sini nga partner niya sa negosyo si Krizia Rhea Gonzaga, 31 anyos, nga isa man sa mga ginatudlo suspetsado sa investment scam.

Dugang pa ni Nierves yara lamang siya sa umbrella sang investment scheme ni Gonzaga.

Apang, aminado si Nierves nga nagpangita man siya sang iban pa nga investors para sa ginatanyag nga negosyo ni Gonzaga.

Ginsaysay ni Nierves nga bulan sang Mayo 2020 siya nagsulod sa investment kag nagsugod lamang sa kantidad nga 50,000 pesos.

Ginkalipay sini matapos makakuha sang una nga pay-out kag na ingganyo nga liwat mag-invest tubtob nga nagdangat sa milyones na ang total investment sini.

Suno kay Nierves, kun sumahon ang iya tanan nga investment kag ginansya kalakip na sang mga investors sa idalom sang iya nga ngalan nagalab-ot ini sa 68.5 milyones pesos.

Sa karun nagapangayo si Nierves sang paghangop kag ginpabutyag nga isa man siya sa mga biktima sang investment scam.

Nagpasalig naman si Nierves sa mga investors sa idalom sang iya nga ngalan nga ibalik niya ang kwarta sa tion nga makahatag na sang pay-out si Gonzaga. | Aksyon John Diaz

What’s your Reaction?
+1
0
+1
0
+1
0
+1
0
+1
0
+1
0
+1
0

MORE STORIES:

LIKE US ON FACEBOOK

error: Ooops... You are not authorized to copy this content.