Gin-umpisahan na subong nga adlaw sang Department of Education ang modified regular enrollment para sa pampubliko nga eskwelahan sa syudad sang Bacolod.
Suno kay Bacolod City Division Schools Superintendent Dr. Gladys Amylaine Sales, ang enrollment sang kabataan ginpaagi sa “Remote online Option” sa diin, ang mga manunudlo sa pampubliko nga eskwelahan amo ang magtawag ukon mag-text sa ginikanan agud marehistro ang ila kabataan para indi na magkadtu pa sa tagsa ka mga eskwelahan.
Ginapangabay man ni Sales ang pila ka ginikanan nga wala sang cellular phone number sa mga maestra nga magpadulong sa gate sang eskwelahan agud makakuha ang numero sang manunudlo kag mag-text ukon makapanawag sa ila para magparehistro ‘on line’.
Dugang pa ni Sales, paagi sa pagpakig-angot sang manunudlo sa mga ginikanan, luyag hibaluon sang ila ahensya ang kinahanglanon sang mga kabataan may angot sa “learning delivery” sa pagbukas sang klase sa maabot nga Agusto 24, 2020.