Arestado ang isa ka miembro sang Philippine Coast Guard (PCG) nga na destino sa banwa sang Hinobaan matapos nagpalupok sang iya armas luthang sa Mambukal Resort sa Barangay Minoyan banwa sang Murcia las 4:20 sang hapon, Enero 4.
Ginkilala ang gin-aresto kay Sergeant Jomar Bandiola, 37 anyos sang Barangay Progreso banwa sang Binalbagan.
Suno kay Major Robert Dejucos, hepe sang Murcia PNP, nakainom sang makahulubog nga ilimnon ang suspek sang iya napalupok ang issued firearm nga Remington calibre 45 pistol sang isa ka bes nga nag tuga sang kahadlok sa mga tawo sa lugar.
Suno kay Dejucos, base sa mga saksi, sa babaw ginpalupok ni Bandiola ang iya armas apang sa alegasyon sang suspetsado, nag igo lang ini sa duta. Wala naman sang may nasamaran sa amo nga insidente.
Priso karon sa custodial facility sang Murcia PNP si Bandiola kag natalana nga pasakaan sang kaso nga angut sa alarm and scandal kag illegal discharge of firearms.