Kinahanglan nga magpresentar sang travel pass ang mga residente sang syudad sang Escalante Negros Occidental, antis tugutan nga makabiyahe pagwa sa syudad.
Ini ang ginmando ni Mayor Melecio Yap Jr. sa Executive Order nga iya gin-isyu sadtong Hulyo 28, 2020.
Suno sa alkalde, ini nga travel pass ang dapat iisyu sang barangay, sa diin nasaad ang petsa, tinutoyo sang biyahe, kag kumpleto nga address sang destinasyon.
Ini ang ipresentar sa checkpoint ukon terminal antis magbiya sa syudad.
Ang tanan nga mga essential workers nga naga guwa sulod sa syudad, ang kinahanglan nga magpresentar sang company ID ukon certification of employment.
Ini ang kabahin sa ginpatuman nga protocol sang syudad, para mapungan ang local transmission sang Covid-19.
Samtang, ginhugtan pa sang lokal nga panguluhan sang Escalante ang protocol nga dapat sundon sang mga motorista nga nagagwa sulod sa syudad, agud malikawan ang local transmission sang Covid-19.
Sandig sa Executive Order ni Mayor Yap., tanan nga PUV ang dapat nga magsumiter sang passenger manifest sa checkpoint, samtang ang mga non-resident individuals nga pasahero sang PUV ang kinahanglan nga may barangay certificate gikan sa ginhalinan nga lugar.
Ang mga non-resident individuals nga nagamaneho sang pribado nga salakyan, ang dapat man magpresentar sang brgy. certificate, kag isyuhan sang color-coded flaglet ukon sticker ang salakyan bilang indikasyon kun diin ang padulungan nga lugar.
Kun delivery ang tuyo sang biyahe kag kinahanglan nga mag-overnight sa syudad, irequire ang driver kag helper sini nga magtener sa quarantine facility. | Aksyon Marlon Genovea