MGA ALKALDE PABOR SA PAGSAYLO SANG KAPITOLYO SA TALISAY

Share on facebook
Share on google
Share on pinterest
Share on twitter
Share on print

Aprobado sa mga alkalde sang Negros Occidental ang pagsaylo sang building sang kapitolyo probinsiyal sa syudad sang Talisay.

Sa zoom meeting ni Governor Bong Lacson subong nga adlaw, iya ginpahayag nga magapasar sang resolusyon ang Association of Chief Executives nga nagasuporta sa amo nga plano.

Ini ang igasumiter sa Sanguniang Panlalawigan para talakayon sa public hearing upod ang sektor sang mga negosyante.

Dugang pa ni Lacson nga kun maplastar na sang maayo ang plano, ila pabal-on ang contractor nga magatukod sang building agud hibaluon kun san-o pwede umpisahan ang construction

Ang pondo nga gamiton sa pagpatukod sini, amo ang P900 million nga gastuhon kuntani sa pagpatukod sang bag-o nga Provincial Administration Center (PAC) Building, sa 16,000 square meter nga propiedad sa atubang sang National Bureau of Investigation-Bacolod building.

Ini nga kantidad ang kabahin sa P1.2 billion loan agreement sang probinsiya sa Land Bank of the Philippines. | Aksyon Marlon Genovea

LALAKI, PATAY SANG GINALEGAR NAGBATO SANG SERBEHAN WARRANT OF ARREST

Patay ang 51 anyos nga lalaki matapos gin alegar nagbatu sa otoridad sa Purok Santa Rita, Brgy. Dulao, syudad sang Bago, Biernes sang gab-i, Enero 22.

Ginkilala ang napatay nga si Emmanuel Sampane, 51, residente sang Purok Michelle, Brgy Dulao sa amo nga syudad. 

Suno kay Col. Roger James Brillantes, tagpamuno sang regional internal affair service, si Sampane ang wanted sa kaso murder, kag madugay na nga nagapanago.

Tuyo sang operatiba nga iserbi ang mandamiento de aresto nga gin-issue ni Judge Alejandro  Marquez sang RTC 4th Judicial Region, Br 79, Morong, Rizal napetsahan Agosto 25, 1998.

Dugang pa ni Brillantes, samtang nagapadulong sa lugar ang mga otoridad upod sa mga katapo sang Anti-Kidnapping Group gikan sa Kampo Crame, NOCPPO PIU,  BCPO CIU kag iban pa nga pulis gikan sa Bago City Police Station, hinali na lamang sila nga ginpalukpan rason nga nagbalos ang operatiba.

Narekober sa lugar sang insedente ang gin-alegar mga armas ni Sampane nga amo ang isa ka .45 caliber pistol, isa ka 9mm pistol nga may 1 ka magazine kag walo ka mga bala, isa ka .38 cal revolver nga may 6 live ammos, isa ka motorsiklo kag iban pa. | Aksyon Alvin Grava

ANAY POLICE ASSET, NADAKPAN SA BUY-BUST OPERATION

Nadakpan ang isa ka persona nga nagabaligya sang frozen foods kag anay police asset sa buy-bust operation sang Police Station 8 sa Barangay Singcang-Airport syudad sang Bacolod, Biernes sang gab-i.

Gin kilala ang nadakpan kay Remo Togores, 34 anyos kag pumuloyo sang Purok Mainabyanon Brgy. Singcang-Airport syudad sang Bacolod.

Narekober kay Togores ang anom ka sachet sang suspected shabu, shabu paraphernalia nga may market value nga 14 mil pesos.

Suno kay Police Major Jun Ray Batadlan, hepe sang Police Station 8, masobra duha ka bulan ang ila surveillance kag nadakpan si Togores.

Priso si Togores sa Police Station 8 kag napasaka na ang kaso nga paglapas sang R.A. 9165 Comprehensive Dangerous Drug Act of 2002. | Aksyon Eric Magbanua

MORE STORIES:

LIKE US ON FB

error: Ooops... You are not authorized to copy this content.