Mayoriya sa mga empleyado sang gobyerno probinsiyal sang Negros Occidental, ang nakabaton na sang hazard pay kag special risk allowance (SRA), sa tion sang community quarantine bangud sa Covid-19.
Suno kay Progressive Alliance of Capitol Employees President Renelo Lastierre, may diutay na lamang nga mga empleyado ang wala makabaton bangud naatrasar ang pagcomply sang mga ginakinahanglan.
Basi sa computation, P500 kada adlaw ang pagabatunon nga hazard pay sang empleyado depende sa daily time record kag kadamuon sang mga inadlaw sa ila trabaho, umpisa sa implementasyon sang Enhanced Community Quarantine (ECQ) sadtong Marso 30, 2020.
Ang mga health workers naman nga ginakabig bilang mga frontliners, ang makabaton sang hazard pay kag SRA nga 25% sang ila basic salary.
Nahibaluan nga may pila ka mga empleyado sang local government units ang nagareklamo nga tubtub subong, wala pa makabaton sang kaangay nga benepisyo.