MAYOR ESTRAO GINADUSO ANG PAGBUKAS SANG BORDERS SA BASAY KAG BAYAWAN, NEGROS ORIENTAL

Share on facebook
Share on google
Share on pinterest
Share on twitter
Share on print

Nakahanda si Negros Occidental Governor  Bong Lacson nga pamatian ang pangabay ni Hinobaan Mayor Ernesto Estrao sa  plano nga pagbukas sang borders sang banwa, sa  Basay kag Bawayan Negros Oriental.

Suno kay Lacson, iya hulaton ang komunikasyon ni Estrao  antis desisyonan ang amo nga plano. 

Sa  interview sang Aksyon Radyo Bacolod kay Estrao sang Pebrero 21, iya ginpahayag  nga una siya nga makig-angot kay Basay Mayor Beda Cañamaque  kag Bayawan Mayor Pride Henry Teves agud desisyonan ang plano nga pagbukas sang border. 

Kun ini ang matigayon, ginpahayag ni Estrao nga tugutan  na nga makasulod sa Hinobaan ang mga residente sang Basay kag  Bayawan, apang dapat tubtub lamang 12 ka  oras ang pagtener.

Umpisa Marso 1, 2021, pagabuksan  naman ang border sa Mabinay  Negros Oriental kag syudad sang Kabankalan Negros Occidental. | Aksyon Marlon Genovea

649K NGA BALOR SANG INSURANCE GINPANAGTAG SA MGA MANGUNGUMA SA KABANKALAN

Nagpanagtag ang lokal nga gobyerno sang Kabankalan sang P649,000 pesos nga balor sang insurance  halin sa  Philippine Crop Insurance Corporation (PCIC) sa 141 ka mga mangunguma sa isa ka seremonya sa  Demo Farm, Brgy. Hilamonan, syudad sang Kabankalan.

Sa mensahe ni  Mayor Pedro P. Zayco, Jr.  nagalaom siya  nga   ini ang mangin  panugod  sang maayo  nga produksyon sang mga mangunguma  sa masunod nga crop.

Dugang pa sang alkalde, importante  nga mangin maayo  ang pangabuhi sang mga mangunguma, bangud  daku   ang kontribusyon sang sektor sang agrikultura  sa pagpasanyog sa ekonomiya sang syudad.

Nalakip  sa  PCIC insurance coverage  ang epekto sa halit  sang mga kalamidad, sa una kag ikaduha  nga crops sang crop year 2020-2021. | Aksyon Marlon Genovea

13 KA PAWNSHOPS KAG LENDING INSTITUTION NAGBAYOLAR SANG CCTV ORDINANCE SANG BACOLOD

Natukiban sang Bacolod City Police Office nga may 12 ka mga pawnshop kag isa ka lending institution ang nagabayolar sang ordinansa nga pag install sang CCTV.

Si BCPO Director Col. Manuel Placido ang nagsumiter sang listahan sang mga nagabayolar nga establisamento kay Permits and Licensing Division Head Stella Rose Rayos nag ligad nga Pebrero 16, 2021.

Nasaad sa sulat ni Placido nga nag patigayon sila sang Security Survey sa nagkalain-lain nga pawnshop kag lending institution kag pila sa ila ang wala naka install sang CCTV.

Suno kay Placido, ang paginstall sang CCTV ang kabahin sang anti-criminality campaign base man sa ordinansa sang syudad nga naga require sa tanan nga pawnshops, lending institutions kag iban pa nga establisamento nga magbutang sang CCTV.

Dugang pa ni Placido, base sa record sang BCPO, pila ka mga pawnshop kag lending institution ang target sang mga kriminal partikular na ang kawatan bangud ang na install nga CCTV ang depektibo ukon wala guid sang CCTV.

Para kay Placido, ang CCTV ang makabulig para malikawan nga magluntad ang krimen kag mabuligan ang mga imbestigador nga hapos masolbar ang mga crime incident. | Aksyon Dale Salazar

MORE STORIES:

LIKE US ON FB

error: Ooops... You are not authorized to copy this content.