Gina abi-abi ni Bacolod Mayor Bing Leonardia ang online petition nga gin lansar nga naga panawagan kay Presidente Rodrigo Duterte nga imbestigahan ang mga opisyal sang Bacolod ilabi na siya.
Ang online petition ang gin lansar sa change.org kay mag yara na sang masobra 2,500 ka mga pirma angut sa liquidation sang mga gin gastuhan sang syudad sa Covid-19 pandemic.
Gin pahayag ni Leonardia, nga wala sila sang may gina tago kag bukas ano man nga oras para sa imbestigasyon.
Suno sa Alkalde, bukas ini sa lehitimo nga imbestigasyon kaangay sang Commission on Audit, DILG, Ombudsman ukon Office of the President.
Suno sa Alkalde, wala man sang LGU nga wala sang accounting system kag built-in na ang check and balance kag auditing system.
“Naghalin ni kuno sa Bacolod Exposed. Kabalo naman kame nga pulitika na ya ang ila. Daw gina pagwa nila nga indi kame mag pag imbestigar. We are open to any investigation. Basta legitimate lang nga investigation. Pwede kame ma imbestigahan sang COA, DILG, Office of the President. Anytime, wala kme may gina tago,” suno sa Alkalde.
Nag pangabay si Leonardia sa publiko nga indi mag painto kag indi mag patalang.
Para sa Alkalde, ang bug-os nga paminsaron ang dapat nakatutok karon sa pakig-away kontra Covid-19 kag maabot sa insakto nga tion ang pulitikina.
Naga panawagan si Leonardia nga ipaiway ang pulitika para sa kaayuhan sang syudad.
Gina lantaw ni Leonardia nga ini ang ‘organized crime’ bangud ang presentasyon sa social media ang ‘professionally done’ kag indi ubra sang ordinaryo nga tawo sa tuyo nga gub-on ang administrasyon. | Aksyon Dale Salazar