Nag pangabay si Bacolod Mayor Evelio Leonardia sa mga barangay officials nga bantayan ang ila sini nga mga lugar para masiguro nga masunod ang minimum health standards.
Suno sa Alkalde, dapat masiguro sang mga opisyal sa barangay nga masunod ang pag suksok sang face mask, pag hugas sang kamot, pag tinir sa balay kag social distancing sa tanan nga tion.
Suno kay Leonardia, base sa impormasyon nga gin palab-ot sa iya sang kapulisan, masobra 100 na ang nadakpan nga nag bayolar sang social distancing kag wala naga suksok sang face mask.
Dugang pa ni Leonardia, ini ang maga serbe nga warning sa tanan kasunod nga iga-intensify pa sang otoridad ang pagpatuman sang mga basic health protocol.
Suno sa Alkalde, indi indi makapati nga may tawo sa gihapon nga wala naka hangop kon ano ka delikado ang Covid-19 kag indi ini lahog-lahog.
Suno pa kay Leonardia, ara sa gihapon ang pamahog sang virus ano man ang estado sang isa ka LGU low-risk man, GCQ ukon ECQ.
Samtang, gin pahayag ni Leonardia nga iban nga tawo ang naga pamulitika.
Ini angut sa pamangkot sang media nga gin alegar wala sang koordinasyon sa tunga sang Bacolod nga nag extend sang ECQ kag ang Negros Occidental nga nag paidalum sa GCQ sang Mayo 1 tubtob 15.
Suno kay Leonardia, iya sabton ang ini nga isyu sa insakto nga tion.
Pero suno sa Alkalde, nakita sang National IATF kag ni Presidente Rodrigo Duterte ang merit kag validity sang pangabay sang LGU nga mag pabilin sa ECQ. | Aksyon Dale Salazar
