Gin palab-ot ni Bacolod Mayor Bing Leonardia kay DOH Secretary Francisco Duque III ang apilar sang mga lideres sang simbahan sa syudad angut sa pagpatigayon sang misa samtang gina patuman ang mga preventive measures kontra Covid-19.
Ang sulat ang nepetsahan Mayo 18 nga naga apilar nga tugutan ang 50% sang attendance sang mga naga simba sa syudad.
Suno kay Vice Mayor El Cid Familiaran, chairman sang Bacolod IATF, sa idalum sang guidelines sang National IATF, maximum nga 10 ka tawo ang gina tugutan sa pag patigayon sang mass gathering.
Dugang pa ni Familiaran, ang mga simbahan ang maga patuman man sang istrikto nga mga preventive measures kaangay sang social distancing, pag suksok sang face mask, disinfection pagkatapos sang kada misa, pag-spray sang alcohol sa maga simba kag temperature check.
Nasaad sa sulat ni Leonardia nga kon tugutan ang religous rites, services kag sacraments nga may paghalong, mas mapabakod ang mental kag spiritual health sang tawo nga kinahanglan sa pakig-away kontra Covid-19.
Naga laum si Familiaran nga antes ang Domingo nga adlaw, may yara na sang sabat ang gobyerno nasyunal. | Aksyon Dale Salazar
