Nag apelar si Bacolod City Mayor Evelio Leonardia sa mga Kapitan kag mga Barangay Kagawad nga kumbinsihon ang ila mga pumuluyo nga magpaidalom sa swab test para sa COVID-19.
Sa press release, gin pahayag sang alkalde, dapat kumbinsihon sang mga kapitan sang Barangay ang ila constituents para makigbahin sa mass testing, nga libre nga ihatag bangod ini ang nakit an nga epektibo nga paagi agod ma-identify, trace, isolate kag mabulong ang carriers sang virus, maghinay ang paglapta sang masakit kag proteksiyunan ang pamilya sa ila nasakop nga barangay.
Ginhimo ni Leonardia ang apelasyon tungod sa natalana nga “O-Plan: One-Time, Big-Time Mass Testing” sa Agosto 28 tubtub 31, nga inisyatibo sang Provincial Government sang Negros Occidental, nga maga-cover sa 10,000 ka populasyon sa diin, 5,000 ang sa syudad sang Bacolod kag 5,000 ang halin sa mga syudad sang Silay, Talisay, Bago kag banwa sang Murcia.
Ang RT-PCR tests sa Bacolod residents gintalana sa Agosto 28 tubtub 29 kag ang sa Silay, Talisay, Bago kag Murcia patigayunon sa Agosto 30 tubtub 31. | Bacolod PIO, Aksyon Ann Defensor
