MASOBRA 8 MILYONES NGA BALOR SANG ILIGAL NGA DROGA GIN SUNOG SANG PDEA 6 KAG PRO 6

Share on facebook
Share on google
Share on pinterest
Share on twitter
Share on print
(PDEA 6 Photo)

Ginsunog sang PDEA Regional Office-6 kag Police Regional Office 6 ang masobra 8 milyones pesos nga balor sang ilegal nga droga sa Gegato-Abecia Funeral Homes and Crematory Inc. sa Coastal Road, Jaro, syudad sang Iloilo subong nga adlaw, Hwebes.

Suno kay PDEA-6 Public Information Officer Sheh Tanaleon, ang pagsunog sang ilegal nga droga ang pagsunod sa direktiba ni Presidente Rodrigo Duterte kag sang layi.

Ang mga droga ang ginsunog pinaagi sa thermal decomposition ukon thermolysis. Nagdangat sa 7, 772, 363.28 pesos; 3, 741.2947 gramos sang marijuana nga nagabalor 448, 955.36 pesos; masobra isa ka gramo sang ephedrine nga nagabili masobra 353 pesos kag duha ka mga tabletas sang diazepam nga nagabili 32 pesos ang ginsunog.

Pagpahayag ni Tanaleon, ang amo nga mga ilegal nga droga ang narekober sa mga drug operations sang PDEA kag Philippine National Office kag may mando na gikan sa korte nga gilayon sunugon. | Aksyon John Diaz

APAT KA MGA KARABAO PATAY MATAPOS NAIGO SANG KILAT SA BARANGAY BACONG, BAGO CITY

Patay ang apat ka mga karabao sang Pamilya Dellosa matapos naigo sang kilat sa Purok Kalubihan, Barangay Bacong, syudad sang Bago, Sabado, Mayo 8.

Sa interview sang Aksyon Radyo kay Carlo Dellosa, 18 anyos, ang apat ka karabao ang yara sa idalum sang kawayan sang natabo ang insidente.

Suno kay Dellosa, mga las 12 kaina sang udto sang nag ulan sa ila nga lugar, nag init, antes nga nag igo ang makusog nga kilat.

Nagapati si Dellosa nga naigo sang kilat ang apat nila karabao bangud nasunog ang pila ka bahin sang lawas sang sapat.

Nagakasubo ang Pamilya Dellosa sa nadangatan sang karabao nga nagabulig sa ila sa uma. | Aksyon Dale Salazar

PRISO SA ESCALANTE PNP GINBAWIAN KABUHI SA HOSPITAL

Patay ang isa ka bilanggo sang Escalante City Police Station samtang ginabulong sa Vicente Gustilo District Hospital syudad sang Escalante.

Ang napatay ginkilala kay Radjie Yap , 20 anyos, residente sang Yolanda Homes, Barangay Washington, sa amo nga syudad.

Suno kay PLt Col. Gil John Despi, nabilanggo si Yap sadtong February 23, 2021 matapos gindakop sa kaso frustrated homicide.

May 6, 2021, ginpa check-up sa doctor si Yap matapos nakabatyag sang stomach pain, kag  kahapon (May 7, 2021) las 9:40 sang aga gin-confine sa ospital matapos nakaangkon sang inasod asod nga pagpalanakit sang tiyan.

Las 12:45 sang hapon ini gindeklarar patay samtang ginabulong sa ospital bangod sa acute respiratory failure. | Aksyon Alvin Grava

MORE STORIES:

LIKE US ON FB

error: Ooops... You are not authorized to copy this content.