Gin sealed-off ang 11 ka mga balay sa Purok Everlasting, Brgy. 18 syudad sang Bacolod matapos nagpositibo sa COVID-19 ang isa ka maestro sa kolehiyo sa syudad sang Bacolod.
Suno kay Punong Barangay Madeleine Diaz, boluntaryo nga nagpaidalom sa swab test sa isa ka pribado nga ospital ang nagpositibo matapos nga nag batyag sang sintomas.
Ginabulubanta 40 ka mga indibidwal ang apektado sa pagsealed-off sang 11 ka mga balay sa Purok Everlasting.
Samtang, ginakumpirmar pa karun ni Diaz ang report nga nagpositibo man sa COVID-19 ang duha ka mga kaupdanan sang isa ka technician sa Corazon Locsin Montelibano Memorial Regional Hospital (CLMMRH) nga una na nareport nga nagpositibo sa masakit.
Natalana nga ipaidalom sa swab test ang apat mga persona nga nagatinir sa una nga panalgan sang ginarentahan nga balay sang mga COVID-19 positive patients sa Purok Cordova, Brgy. 18.
Nagapabilin man nga sealed-off ang 11 ka mga balay sa amo nga purok kun sa diin 41 ka mga persona ang apektado.
Nagpasiguro naman si Diaz nga magabulig ang barangay sa mga kinahanglanon sang mga pumuluyo nga apektado sang sealed-off. | Aksyon John Diaz
