Gindeklarar nga patay ang maglive-in partner samtang pilason naman ang ang upod nila nga bata sa aksidente nga nagluntad sa National Highway sang Hacienda Manuel Kho, Barangay Pandanon, Banwa sang Murcia mga las 10 sang Domingo sang gab-i.
Ang mga nagkalamatay ginkilala nga sanday Arnel Calalas, 27 anyos kag Jessa Laranio, 22 anyos, samtang ang pilason ginkilala naman kay Jesnel Calala isa ka menor de edad kag tanan nagapuyo sa Purok Paradahan sa amo man nga Barangay.
Suno kay P/Lt. John Paul Tabujara, hepe sang Murcia PNP, nagapa-uli na ang mga biktima sakay sa motorsiklo sang nagbunggo sa nagaparking nga truck sa kilid sang karsada.
Dugang ni Tabujara, bangud nga naga-ulan kag medyo madulom ang kugar, posible nga wala matalupangdan sang driver ang truck.
Naka-angkon sang malubha nga pilas sa ulo ang maglive-in partner bangud wala sila sang helmet nga gintunaan sang ila kamatayon.
Estable naman ang kahimtangan sang bata.
Gilayon man nga nagsungka ang driver sang truck nga si Hans Uyco, 19 anyos kag nagapuyo sa Barangay Igmaya-an, Banwa sang Don Salvador Benedicto. Ginahulat pa kun anu ang desisyon sang pamilya sang nagkalamatay. | Aksyon Bryan Morden