MADAMO NGA NEGOSYO SA AYALA CAPITOL CENTRAL MALL, NAG PROSESO NA SANG ILA BUSINESS PERMIT

CHO: WALA SANG CLUSTERING SANG PERTUSSIS SA BACOLOD

Wala gina rekomendar sang Bacolod City Health Office ang pag deklarar sang outbreak sang pertussis.

Ini matapos nagsaka sa anum ka mga kaso sang pertussis ang na record sa syudad.

Sa press conference, Lunes, ginpahayag ni City Health Officer Dr. Ma. Carmela Gensoli, wala sang clustering sang pertussis sa syudad sang Bacolod.

Nagpasiguro si Gensoli nga preparado ang mga hospital sa Bacolod sa sini nga mga kaso.

Padayon nga ginapanawagan sang Bacolod CHO nga kompletuhon ang bakuna sang mga bata bilang proteksyon sa mga masakit.

Ginpahayag ni Dr. Jevi Marie Ortoño, Medical Officer III kag National Immunization Program Medical Coordinator, sang 2023, yara lamang sa 60% sang 11 mil nga target population sang mga bata nga manug edad isa ka tuig ang nabakunahan.

Suno kay Ortoño, subong nga 2024, yara sa 10 mil ang target population sang mga bata ang target nga makompleto ang bakuna sa pag edad sang isa ka tuig.

Ginpaathag ni Ortoño, lakip sa mga rason nga nagapamalibad ang ginikanan sa bakuna amo nga nagamasakit ang ila bata, wala ang ginikanan sa balay para maghatag permiso sa pagbakuna, ang kabalaka sa side effects kag may yara sang wala nagapati sa bakuna.

Suno kay Ortoño, padayon nila nga gina edukar ang publiko nga mas mataas ang benepisyo sang mahatag sang bakuna sa mga kabataan.

Para kay Dr. Gensoli, preventable kag curable ang pertussis.