Nag umpisa na ang preparasyon sang Land Transportation Office ukon LTO sa syudad sang Bacolod angut sa gina lauman nga pag downgrade sang syudad gikan sa Enhance Community Quarantine pakadto sa General Community Quarantine pagkatapos sang Mayo 15.
Suno kay LTO Bacolod District Office head Reuben Tampos, ini nga lihok ang kabahin sang direktiba nga gin papanaug ni LTO Region 6 Director Eric Lenard Tabaldo.
Dugang pa ni Tampos, sa tion nga madayon ang pag downgrade sang Bacolod sa GCQ gilayon man nga maga balik ang operasyon sang ila talatapan sa palaabuton nga Mayo 18.
Sa pihak nga bahin, bangud sang GCQ nga una gin patuman sa bilog nga probinsya natalana naman nga maga umpisa ang operasyon sang nagkalain lain nga mga LTO District Offices sa Mayo 13.
Samtang, suno kay Tampos, mangin limitado lamang ang ila pagbaton sang mga kliyente enkaso nga madayon gid man ang pagbukas sang ila opisina sa Mayo 18.
Suno kay Tampos, naga panguna nga rason diri amo ang hugot nga pagpatuman sang naga kaigo nga protocol ilabi na ang social distancing para malikawan ang ano man nga problema dulot sang gina kabalak-an nga COVID 19.
Prayoridad sang talatapan sang LTO sa bahin sang Registration amo ang pag renew sang mga plaka nga naga tapos sa numero tres kag kwatro. | Aksyon Art Tayhopon
