LSI NGA NAGNEGATIBO SA COVID-19 NAGPAHAMTANG SANG TARPAULIN

Share on facebook
Share on google
Share on pinterest
Share on twitter
Share on print

Nagpahamtang sang tarpaulin ang isa ka Locally Stranded Individual (LSI) sa gwa sang ila puluy-an sa banwa sang Isabela, probinsya sang Negros Occidental agud ipaathag sa publiko nga siya ang negatibo sa coronavirus disease 2019.

Si Ray Vincent Amador, 25 ayos, isa ka locally stranded individual nga nagtrabaho bilang isa ka medical representative sa Metro Manila.
Sa exclusive interview sang Aksyon Radyo Bacolod, nahibaloan nga si Amador nagpauli sa probinsya sang Negros Occidental sadtong Hunyo 10, 2020 sakay sa isa ka sweeper flight kag gilayon man nga ginpaidalom sa swab test sa Bacolod-Silay International Airport, syudad sang Silay.

Naghulat si Amador sang 17 ka adlaw antis pa man mag-abot ang swab result sadtong Hunyo 27, 2020 kag nagpasalamat ini matapos nga magnegatibo sa COVID-19.

Sa text message nga ginpadala ni Amador sa Aksyon Radyo Bacolod ginpahayag sini nga luyag lamang niya ipahibalo sa mga pumuluyo ilabi na sa mga nagahatag sang negatibo nag komento kag panan-awan matapos magpaidalom sa home quarantine nga likawan kag untatan na ang diskriminasyon sa ila nga mga returning residents, locally stranded individuals kag repatriated overseas filipino workers.

Pagpaathag ni Amador nag-ayo ini nga magpaidalom sa home quarantine pag-abot sa banwa sang Isabela bangud luyag sini makita ang iya pamilya.

Suno pa sa LSI, naga-isahanon ini sa ginatiniran nga condominium unit sa sulod sang tatlo ka bulan kag iya gin-aligar nga nakabatyag na siya sang depresyon.

ABISO SANG PSYCHOLOGIST
May angut sini, nagapahunumdom ang isa ka mental health advocate sa publiko nga kun mahimo buligan ang mga returning residents, locally stranded individuals kag repatriated overseas filipino workers nga mahagan-hagan ang ginabatyag nga kahidlaw, problema kag kasubo samtang yara sa quarantine facility lamang masiguro nga antis makaupod ang himata luwas ini sa makamamatay nga COVID-19 nga balatian paagi sa paghatag sa ila sang maayo nga abiso kag positibo nga panan-awan sa pagpangabuhi.

Aminado si Dr. Ana Panganiban, Volunteer Counselor sang Western Visayas Psychological Support Group, nga bangud sang padayon nga pagsaka sang kaso sang COVID-19 sa pungsod Pilipinas indi malikawan nga madamo ang nagasiling nga ini naggikan sa mga nagapinauli nga mga pinoy.

Sa interview sang Aksyon Radyo Bacolod ginpaathag ni Panganiban nga indi dapat pag “i-generalize” ang sitwasyon bangud mas madamo sa gihapon ang nagnegatibo sa COVID-19 kag halos tanan man nagasunod sa protocol sang gobyerno.

Sa mga online discussions nga ginapangunahan ni Panganiban kaupod ang pila ka mga LSI kag OFWs, madamo ang nagpalab-ot sang mensahe nga bisan ang ila pamilya ang nabiktima sang diskriminasyon.
Suno kay Panganiban, ang diskriminasyon ang posible maka-apekto sa mental health sang mga pinoy nga direkta naapektuhan sang pandemic.

Panugyan ni Panganiban sa publiko nga ang malain nga pagtratar sa iban nga tawo ang may malain man nga konsekwensya nga mahimo makatuga sang long-term effect sa ila nga mental health.

ABC SANG MENTAL BATUK PANDEMIC
Apisar sang kabudlayan nga gina-atubang sang publiko bangud sang pandemic nagapati si Panganiban nga paagi sa ABC mahimo mabuligan ang nagasuprer sang depresyon.

Ang A amo ang “awareness” nga nagapahanumdom sa publiko nga mangin updated sa mga nagakatabo sa palibot ilabi na may kaangtanan sa COVID-19.
B naman ang pagbalanse sa mga aktibidad, trabaho, hampang kag pagpahuway.

Gina-ingganyo ang publiko nga tutukan ang “inner balance” agud mahibaloan ang tinutuyo sini sa sosyudad.

Ang C naman amo ang “connections”. Suno kay Panganiban sa sini nga krisis kinahanglan sang tanan ang pag-inchindihanay, pag-abyanay kag paghinirupay.

MENTAL HEALTH PSYCHOLOGICAL TASK FORCE
Maga pangabay naman si Vice Mayor El Cid Familiaran kay Mayor Evelio Leonardia nga mag isyu sang Executive Order nga naga tukod sang Mental Health Psychosocial Task Force.

Suno kay Familiaran, nag pabutyag ang mental health professionals kag advocates nga luyag nila buligan ang mga Covid-19 positive nga may traumatic experiences nga posible mag resulta sa depression.
Ginaduso man sang grupo nga magtukod sang Mental Health Office.

Gina abi-abi ni Familiaran ang bulig sang mga ini kasunod nga overworked na ang mga doktor sang syudad kag ang naga isahanon nga psychiatrist sang CHO.

Suno sa Bise-Alkalde, nag tanyag man ang grupo nga mag establisar sang online support system ukon mag patigayon sang face to face consultation kon kinahanglanon.

Gin ehemplo man ni Familiaran ang mga gina agyan sang returning OFWs kag Locally Stranded Individuals nga nag-quarantine na sa iban nga lugar, pero liwat nga i-quarantine pag abot sa syudad.

Suno pa sa Bise-Alkalde, may mga tion man nga gina-discriminate ang mga LSI sa komunidad bisan nga nag negatibo ang resulta sang ila test.

MORE STORIES:

LIKE US ON FB

error: Ooops... You are not authorized to copy this content.