Nagreklamo sa Aksyon Radyo Bacolod ang amay sang isa ka loan officer matapos gin alegar gin kastigo ang iya bata sang pulis kag iya mga kaupdanan sa Barangay San Miguel, banwa sang Murcia gab-i sang Enero 2.
Gin pahayag ni Fernando Gayoba Jr., 63 anyos kag amay sang biktima, confine sa karon sa Riverside Medical Center ang iya anak nga si Raymond Cabrillos Gayoba, 35, matapos gin kastigo sang gin alegar pulis kag apat ka iban pa.
Suno kay Gayoba, nagkadto ang iya anak sa Brgy. San Miguel para magtabo sa isa ka babaye, pero pag abot sa lugar, gin alegar nag abot ang isa ka pulis nga nag lampos sang botilya sa iya bata kag gin kastigo sang iya kaupdanan.
Gin alegar ni Gayoba nga love triangle ang posible rason sang pagkastigo sa iya nga bata.
Nag pamalibad si Police Major Roberto Dejucos, hepe sang Murcia PNP, nga hingadlan ang pulis nga imboblado sa insidente samtang naga padayun pa ang imbestigasyon pero ini ang na-assign sa Regional Mobile Group sa Panay.
Suno kay Dejucos, ila pa gina hulat nga maka recover ang biktima tubtob nga maka file sang pormal nga kaso batuk sa mga suspek. Indi naman ma kumpirmar ni Dejucos nga love triangle ang motibo sang insidente.
Suno kay Dejucos, may plano man ang pulis nga suspek nga mag pasaka sang kaso batuk sa biktima.
