Nagpanagtag na sang food packs ang lokal nga panguluhan sang Toboso Negros Occidental, sa mga Tobosenios nga maapektohan sang lockdown sa Bacolod, Bago, Talisay, Silay, kag Murcia, umpisa Agusto 28 tubtub 31, 2020.
Suno kay Mayor Richard Jaojoco, lima ka kilo nga bugas kag sardinas ang personal nga ginhatag sa kada indibidwal, sa distribution nga ginpatigayon kaina sang aga sa vicinity sang Provincial Capitol Lagoon syudad sang Bacolod.
Una nga nagpost sang pahibalo ang Toboso sa ila official facebook page, kun paano makakuha sang relief assistance.
Suno sa alkalde, kalabanan sa mga Tobosenios ang nagatrabaho sa syudad sang Bacolod kag nagatener sa mga boarding houses.
Nagalaom si Jaojoco nga mahatagan sang food packs ang tanan nga apektado, antis ang implementasyon sang lockdown sa Biyernes. | Aksyon Marlon Genovea